Craig Bellamy
Mae QPR wedi trafod arwyddo Craig Bellamy, yn ôl is-gadeirydd y clwb, Amit Bhatia.

Roedd sïon y byddai Craig Bellamy naill ai un symud i glwb Rangers, neu yn ôl i Gaerdydd, ar ôl ei gyfnod yn chwarae gyda thîm pêl-droed y Deyrnas Unedig.

Mae rheolwr newydd Lerpwl, Brendan Rodgers, wedi dweud yr hoffai gadw’r ymosodwr 33 oed yn Anfield.

Ond mae gan Craig Bellamy hefyd gysylltiadau cryf â’i gyd-Gymro, Mark Hughes, sy’n rheolwr QPR ac yn gyn-reolwr Cymru.

“Mae Craig yn sicr yn enw sydd wedi ei grybwyll,” meddai Amit Bhatia. “Mae yna nifer o ddewisiadau gwahanol.

“Bydd rhaid i Mark benderfynu yn y pen draw, ac mi fyddwn ni yn ei gefnogi.”