Mis Mehefin oedd y gwlypaf erioed yng Nghymru ers dechrau cadw cofnodion, datgelwyd heddiw.
Er dechrau’r mis mae mwy na 7 modfedd o law wedi syrthio, dwywaith y cyfartaledd.
Capel Curig yn Eryri oedd y man gwlypaf yn y Deyrnas Unedig yn ystod y mis a aeth heibio, yn ôl ystadegau y Swyddfa Dywydd.
Syrthiodd dros droedfedd o law yno (316mm) yn ystod mis Mehefin, sef dwywaith a hanner y cyfartaledd ar gyfer y mis.
Tirabad ym Mhowys oedd yr wythfed man glwypaf yn y Deyrnas Unedig. Syrthiodd 206mm o law yno.
Arweiniodd y glaw trwm at lifogydd difrifol yng ngogledd Ceredigion ddechrau’r mis. Achubwyd 150 o bobl gan y gwasanaethau brys a bu’n rhaid i tua fil o bobl symud er mwyn osgoi’r llifogydd.
Dechreuwyd cadw cofnodion ar gyfer Gymry yn unig yn y flwyddyn 1910.
Mae proffwydi’r tywydd yn rhagweld y bydd y glaw yn parhau i ddisgyn am gyfnod eto. Does dim unrhyw arwydd o dywydd poeth ar y gorwel, medden nhw.
Daw’r mis Mehefin gwlypaf ers dechrau cadw cofnodion, ar ôl y mis Mawrth poethaf ers 50 mlynedd. Roedd hefyd gyfnod o gynhesrwydd anhymhorol ym mis Mai.
Dywedodd proffwydi’r tywydd bod y glaw yn ganlyniad i newid yn lleoliad y jetlif, sydd fel arfer yn llifo rhwng yr Alban a Gwlad yr Iâ yn ystod yr haf.
