Cyhoeddi pennaeth newydd Radio Cymru

Mae BBC Radio Cymru wedi cyhoeddi mai Lowri Rhys Davies sydd wedi ei phenodi yn Olygydd Rhaglenni Cyffredinol Radio Cymru.

Bydd Lowri Rhys Davies yn gyfrifol am gomisiynu a goruchwylio holl raglenni Radio Cymru, sy’n darlledu hyd at ugain awr o raglenni bob dydd.

Mae  Lowri Rhys Davies wedi bod yn gynhyrchydd gyda BBC Radio Cymru ers 2003, ac yn is-olygydd ar gyfnodau gwahanol ers 2008. Bydd hi’n cydweithio’n agos gyda Phennaeth Rhaglenni a Gwasanaethau Cymraeg BBC Cymru, Siân Gwynedd.

Profiad

“Mae gan Lowri flynyddoedd lawer o brofiad o gynhyrchu rhaglenni radio ac o arwain timau cynhyrchu” meddai Siân Gwynedd.

“Mae  ganddi adnabyddiaeth dda o Radio Cymru fel gorsaf a rydw i’n siwr y bydd hi’n cyflawni gofynion y swydd newydd hon ac yn gosod sylfeini cadarn i’r orsaf yn y dyfodol.”

Dywedodd Lowri Rhys Davies fod Radio Cymru’n bwysig iddi’n bersonol.

“Dyma’r orsaf y cefais i fy magu yn gwrando ar ei rhaglenni, a dwi wedi cael y fraint o weithio fel cynhyrchydd yma ers bron i ddegawd.

“Dwi’n edrych ymlaen yn fawr rwan i arwain y timau sy’n gweithio ym Mangor a Chaerdydd drwy gyfnod o newid a sicrhau fod Radio Cymru’n parhau i gynhyrchu rhaglenni cryf a chreadigol sy’n berthnasol i’n cynulleidfa.”