Gethin Jenkins - y pryder diweddara
Mae’r prop, Gethin Jenkins, wedi ychwanegu at broblemau Cymru bythefnos cyn y Chwe Gwlad.
Chwaraewr y Gleision yw’r diweddara’ o brif chwaraewyr Cymru i gael ei anafu – fe fu’n rhaid iddo adael y cae wedi 36 munud o’r ornest yn erbyn Racing Metro ddoe.
Ynghynt yn y penwythnos, roedd Dan Lydiate, blaenasgellwr y Dreigiau, a Rhys Priestland, maswr y Scarlets, wedi cael eu hanafu hefyd.
Roedd hi’n ymddangos bod Jenkins wedi cael anaf i’w ben-glin yn y fuddugoliaeth o 36-30 wrth i’r Gleision gyrraedd rownd wyth ola Cwpan Heineken.
Priestland a Lydiate
Dioddefodd Priestland anaf i’w ben-glin yn ystod buddugoliaeth 16-13 y Scarlets yn erbyn Castres yn Ffrainc.
Dim ond 16 munud a chwaraeodd Lydiate 16 munud i Ddreigiau Casnewydd-Gwent wrth iddyn nhw faeddu Cavalieri Prato ar Rodney Parade.
Mae’n debyg ei fod yn dioddef o anaf i’w ffêr, problem a orfododd iddo golli rhai o gemau Cymru yng Nghwpan y Byd y llynedd.
Gwlad Pwyl
Fe fydd hyfforddwr Cymru, Warren Gatland, yn mynd a grŵp 35 dyn i Wlad Pwyl yr wythnos nesaf er mwyn paratoi ar gyfer eu gêm yn erbyn Iwerddon yn Nulyn bythefnos i heddiw.
Mae eisoes wedi colli’r blaenwyr Luke Charteris, Alun-Wyn Jones a Lloyd Burns oherwydd anafiadau.
Mae yna bryder hefyd am ganolwr y Gleision, Jamie Roberts, sydd wedi anafu ei ben-glin.
Dywedodd hyfforddwr y Scarlets, Nigel Davies, nad oedd yn gwybod pa mor ddifrifol oedd anaf Priestland eto.
“Bydd rhaid disgwyl i gael gweld,” meddai. “Y gobaith yw nad yw’n rhy ddifrifol.”
