Cymru yw un o’r llefydd mewn peryg mwyaf o gynnydd mewn tlodi plant yng ngwledydd Prydain, yn ol adroddiad newydd sy’n cael ei gyhoeddi heddiw gan yr Ymgyrch i Ddileu Tlodi Plant.
Un o’r rhesymau am hyn yw bod Cymru wedi gweld cynnydd yn nifer y plant sy’n dod o gartrefi lle mae’r rhieni yn ddi-waith o ganlyniad i’r argyfwng economaidd – cynnydd o 16% i 18% rhwng 2008 a 2011 sy’n fwy nac unrhyw un o’r rhanbarthau yn Lloegr.
Mae’r ymgyrch yn cyhoeddi ffigyrau newydd heddiw, map o dlodi yng Nghymru gyda data yn dangos cyfradd tlodi ar gyfer pob ward, awdurdod lleol ac etholaeth.
Yr awdurdodau lleol gyda’r cyfraddau uchaf o dlodi plant yng Nghymru yw:
| Blaenau Gwent | 29% |
| Merthyr Tudful | 28% |
| Caerdydd | 26% |
| Caerffili | 25% |
| Castell-nedd Port Talbot | 25% |
| Casnewydd | 25% |
| Rhondda, Cynon, Taf | 25% |
| Prydain ar gyfartaledd | 21% |
‘Gweithredu ar frys’
“Mae’n rhaid i Lywodraeth Cymru a San Steffan weithredu ar frys i atal cynnydd mewn tlodi plant,” meddai Alison Garnham, Cyfarwyddwr Gweithredol yr Ymgyrch.
“Rhaid i swyddi da i rieni yng Nghymru fod yn flaenoriaeth ac mae angen i’r sector cyhoeddus a phreifat weithio i sicrhau fod cyfleoedd cyflogaeth safonol ar gael ynghyd â gofal plant fforddiadwy.”
Mae Barnardo’s yn aelod o’r glymblaid Dileu Tlodi Plant ac yn darparu gwasanaethau ar gyfer teuluoedd yng Nghymru.
Fe ddywedodd Cyfarwyddwr Barnardo’s Cymru, Yvonne Rodgers fod y Llywodraeth wedi “ymrwymo i roi terfyn ar dlodi plant erbyn 2020.”
“…ond os na chymerir camau ar frys i greu gwell cyfleoedd bywyd i blant, bydd y rhagolygon ar gyfer teuluoedd yn parhau yn gywilyddus o lwm.”
