A fydd Leanne Wood yn sefyll?

Leanne Wood
Mae Plaid Cymru yn parhau i ddyfalu a fydd yr Aelod Cynulliad, Leanne Wood, yn ymgeisydd am arweinyddiaeth y blaid ai peidio.

Yn ôl llefarydd ar ran y blaid, dyw hi heb benderfynu sefyll eto, ond wedi dweud nad ydi hi am ddisytyru’r posibilrwydd.

Cyhoeddodd y gwleidydd ar raglen am.pm ddoe bod nifer o aelodau y blaid wedi galw arni i sefyll.

Ychwanegodd fod “aelodau ifanc Plaid Cymru yn rhedeg ymgyrchoedd bach ar Facebook, Twitter a YouTube er mwyn ceisio fy mherswadio i sefyll.”

Mae gan y gwleidydd 39 oed o’r Rhondda wreiddiau sosialaidd, a chysylltiad cryf ag ardaloedd diwydiannol de Cymru, sy’n darged i Blaid Cymru.

Ond dywedodd llefarydd ar ran y blaid wrth Golwg 360 nad oedden nhw’n gwybod eto beth fyddai penderfyniad Leanne Wood.

“O’r hyn dw i’n deall, dyw hi ddim wedi dweud ei bod hi’n sefyll, ac yn sicr does dim cyhoeddiad wedi ei wneud ganddi ar y mater,” meddai’r llefarydd.

“Y cyfan ma’ Leanne Wood wedi ei ddweud yw nad yw hi’n diystyru’r posibilrwydd o sefyll.”

Daw sylwadau Leanne Wood ychydig dros fis cyn y bydd yr ymgyrch i olynu Ieuan Wyn Jones yn dechrau o ddifri’.

Bydd unrhyw ymgeiswyr am arlywyddiaeth Plaid Cymru yn gorfod cyflwyno’u henwau i’r blaid yn swyddogol erbyn 26 Ionawr 2012, a bydd y hystyings cyntaf yn cael eu cynnal ym mis Chwefror.

Bydd yr arweinydd newydd yn cael ei dewis erbyn cynhadledd y blaid ym mis Mawrth.

Mae AC Ceredigion, Elin Jones, ac AC Dwyfor-Meirionydd, Dafydd Elis-Thomas eisoes wedi dweud eu bod nhw’n bwriadu sefyll.

50 sylw

Iwan Prys 24 Tachwedd 2011, 13:20

Rwy’n gobeithio’n fawr iawn ei bod hi yn sefyll, mae angen rhywun newydd gydag apêl ehangach, yn hytrach na’r un hen wynebau.

Ifor Hughes 24 Tachwedd 2011, 13:24

Gobeithio wnaeth hi ddim – syniadau adain chwith sydd wedi methu ganwaith or blaen.

Ma’na formula sydd wedi gweithio dro ar ol tro i wledydd bychain cyfradd treth isel – fel y Swisdir os bydd cyfraddau treth Cymru’n is na rhao Lloegr oherwydd peidio gwario ar ryfeloedd tramor ayyb bydde’r wald ma nol ar ei thraed o fewn dim.

Iwan Prys 24 Tachwedd 2011, 14:01

Ie, duw, mae’r Ffindir, Norwy a Sweden yn methu’n llwyr, wn i ddim pam fyddai unrhyw un eisiau eu copio nhw.

Ann 24 Tachwedd 2011, 14:18

Camgymeriad dwi’n ofni. Efallai y bydd hi’n ennill pleidleisiau sosialaidd y de ond yn colli llu o rai eraill yn y gogledd, gorllewin, ardaloedd gwledig a’r brifddinas.

Crebwyll 24 Tachwedd 2011, 14:19

Hwre!

Llawer gwell y rhagolygiad o weld angerdd Leanne yn cael ei dymheru wrth iddi fod yn y swydd na chychwyn gyda’r perswad politique presennol a cholli pob apel.

Iwan Rhys 24 Tachwedd 2011, 14:47

Byddwn i wrth fy modd o weld Leanne Wood yn sefyll.

Mae’n wleidydd egwyddorol iawn, mae’n barod i ddweud yr hyn sydd angen ei ddweud, mae’n arbennig o weithgar, mae’n torri ar fold yr arweinydd gwryw canol oed o’r gogledd orllewin, mae ganddi syniadau ffres, mae’n areithwraig angerddol . . .

Amdani, Leanne.

Ifor Hughes 24 Tachwedd 2011, 14:56

… o bosib dwi am newid fy meddwl – hoffi’r ymadrodd gan Crebwyll

“angerdd Leanne yn cael ei dymheru”.

Richard Nosworthy 24 Tachwedd 2011, 15:48

Gobeithiaf yn fawr bydd Leanne yn sefyll am sawl rheswm:

1. Byddai Leanne yn apelio at y ’mainstream’ yng Nghymru, ymestyn apel y Blaid a dod a phobl newydd mewn. Byddai hi’n apelio at Gymru gyfan, nid ychydig o ardaloedd gwledig yn unig. Os oes gan y Blaid unrhyw obaith o fod plaid fwyaf ein gwlad mae hyn yn anghenrheidiol.

2. Mae ganddi syniadau ffres a newydd allai wneud bywydau pobl Cymru’n well. Mae ei ‘Cynllun Gwyrdd’ yn gampwaith.

3. Mae hi’n berson hoffus, brwdfrydig, a galluog sy’n dda gyda phobl.

4. Byddai hi’n creu sialens difrifol i’r Blaid Lafur, a dod a phobl newydd i’r Blaid.

5. Mae hi’n credu’n gryf mewn annibyniaeth go iawn.

6. Mae hi’n gefnogol iawn o’r iaith Gymraeg – wedi siarad mewn raliau Cymdeithas yr Iaith, wedi dysgu siarad yr iaith yn dda iawn ac yn sefyll lan dros hawliau ieithyddol.

7. Mae hi’n rhoi blaenoriaeth i bethau pwysig: swyddi, safon byw, amgylchedd lan, cymunedau cryf, cymdeithas deg.

Cer amdani Leanne!

Rhys Llwyd 24 Tachwedd 2011, 15:57

Flwyddyn yn ôl efallai y byddai gen i amheuon ond mae sawl peth wedi newid ers hynny:

i.) wnes i ei chyfarfod hi yn yr Eisteddfod eleni a ches i fy syfrdanu cystal oedd hi wedi dysgu Cymraeg – rhagorol. Dydy hyn felly ddim yn broblem, i’r gwrthwyneb mae ei parodrwydd i ymroi i ddysgu mor rhygl yn dangos ei chefnogaeth i’r Gymraeg. Hefyd, hyd yn oed cyn iddi ddod yn rhugl, roedd hi yn un os nad yr AC Plaid Cymru mwyaf cyson ei chefnogaeth i alwadau ac ymgyrchoedd Cymdeithas yr Iaith.

ii.) mae gen i broblemau gyda sosialaeth Brydeinig ond rwy’n argyhoeddedig mae sosialaeth ddatganoledig mae Leanne yn ei bledio. Does gen i ddim gwrthwynebiad o gwbl i hynny, a dweud y gwir, os oes rhaid i mi roi unrhyw label ar fy nhredo wleidyddol dyna hi.

iii.) yr ymgeiswyr eraill. Gwnaeth Elin waith da iawn fel Gweinidog Amaeth dwi’n meddwl ond dyna ni – mae ei hapel yn gyfung. A wel, Dafydd El, oes angen dweud mwy?

Ifor Hughes 24 Tachwedd 2011, 16:33

..nawr os bydde’n fodlon mynd ar dream ticket gydag Adam Price

Ifor Hughes 24 Tachwedd 2011, 16:39

a gwneud blwyddyn o probation sef sign on gyda Dafydd Wigley a Eurfyl ap Gwilym am ddwy flynedd unwaith yr wythnos i glywed yr economic facts of life – ma hi’n deall probation na beth oedd ei job hi achos fel person dwi hoff iawn ohonni

Crebwyll 24 Tachwedd 2011, 16:54

Amen Richard ac Ifor!

Aled GJ 24 Tachwedd 2011, 17:38

Dau beth sy’n rhaid digwydd wrth i Blaid Cymru ddewis arweinydd newydd:

i) derbyn chwistrelliad o egni a syniadau newydd, wedi cyfnod digon hesb a di-gyfeiriad.

ii) ymestyn ei apel y tu hwnt i gylchoedd arferol y Gymru Gymraeg a’r Gymru Wledig.

Byddai Leanne Wood yn llawer tebycach o gyflawni’r amcanion uchod na’r ddau sydd yn y ras ar hyn o bryd. Mae ganddi syniadau beiddgar am ddatblygu potensial yr economi leol ac economi werdd a mentrau cyd-weithredol fel ffyrdd o adfywio Cymru yn economaidd. Fyddai hi ddim yn swil o arddel annibyniaeth yn gadarn ac mae ganddi’r gallu hwnnw i ymddangos yn berson “normal”, sydd ddim jest yn wleidydd proffesiynol. Er nad ydw i yn sosialydd yn bersonol, dwi ddim yn gweld “sosialaeth” Leanne fel gormod o broblem., Y gwir ydi, bydd rhaid iddi greu diffiniad newydd o’i gwerthoedd crai, er mwyn apelio at bobl y canol a’r dde- nid jest ym Mhlaid Cymru, ond yng Nghymri ei hun. Er mwyn datblygu Cymru yn gymunedol ac yn genedlaethol, mae angen cenhadaeth newydd- ac nid trwy lynu wrth shibolethau’r gorffennol fel sosialaeth y mae gwneud hynny,. Dwi’n siwr y gallai Leanne gynrychioli’r genhadaeth newydd hon yn effeithiol iawn petai hi’n sefyll.

Ifan 24 Tachwedd 2011, 17:53

O na fe de Leanne Wood amdani

CGT 24 Tachwedd 2011, 19:30

Os ydi hi’n agored wrthwynebus i frenhiniaeth Lloegr, mae hi’n haeddu ystyriaeth .

Gareth 24 Tachwedd 2011, 19:37

Byddwn i’n hen ddigon parod i’w chefnogi, ond byddai’n rhaid iddi hithe fod yn fodlon siarad LOT mwy o Gymraeg ar lawr y Senedd nag mae hi wedi wneud hyd yma. Gyda hynny, pob lwc iddi – ymgeisydd cyffrous ac addawol iawn!

Ifor Hughes 24 Tachwedd 2011, 19:52

Er yn anghytuno gyda hi’n economaidd ma’r busnes
“agored wrthwynebus i frenhiniaeth Lloegr” yn apelio

Adam Jones 24 Tachwedd 2011, 20:14

Clywch Clywch Richard!

Eto hi yw’r un fydd yn cael fy mhleidlais i pe fydde hi’n sefyll, ond mae na un OND mawr, er yn ddigon parod i gefnogi’r iaith ac wedi dysgu’r iaith bydde ys dywedodd Gareth yn rhaid iddi ymroi i ddefnyddio’r iaith yn ffurfiol ar lawr y siambr yn gyson hefyd neu rywbeth ymylol fydd y Gymraeg yn hytrach na rhywbeth prif ffrwd.

Ond pob lwc iddi a chefnogwch hi er mwyn y nefoedd, rhywun newydd ffres, apelgar, cyfeillgar, angerddol ac hefyd egwyddorol! Ie fi’n gwybod mae’n anodd gredu mae siarad am wleidydd ydwyf ond yn sicr mae na photensial enfawr fan hyn.

Marc 24 Tachwedd 2011, 21:25

Bydd Leanne yn cyrraedd cynulleidfa newydd sy wedi dadrithio efo gwleidyddion safe a/neu llwgr. MAE gwir angen gwleidyddion gydag egwyddorion a than yn eu boliau. MAE hi hefyd yn perfformio’n dda ar question time ac ati. MAE ei gwleidyddiaeth yn seiliedig ar werthoedd traddodiadol cymreig – cydweithredu a chymunedau – a llwyth o syniadau gwreiddiol yn ei green print. Amdani!

Ifor Hughes 24 Tachwedd 2011, 22:02

Un peth sy’n bendant NID hi fydd y Blaid Lafur moyn i ennill. Gwnewch beth a fynnwch o hynny.

Ffred Ffransis 24 Tachwedd 2011, 23:28

Byddai gweld Leanne yn arweinydd ar Blaid Cymru yn adfer brwdfrydedd llawer o genedlaetholwyr. O blith aelodau arweiniol y Blaid, hi sy’n deall orau’r dywediad “Os yw’r Gymraeg (a Chymru) i fyw, rhaid i bopeth newid”. Arweinydd, nid dirprwy fydd hi. Ei dirprwy delfrydol hi fydd Llyr HG.

Mae un gwir broblem, a honna’n un wleidyddol. Yr un broblem sy’n esbonio pahan nad yw Nerys na Helen Mary ar restr yr ymgeiswyr potensial. Mae aelodaeth Leanne o’r Cynulliad yn ddibynnol ar anwadalwch (personol, nid pleidiol) trefn y pleidleisiau rhanbarth. Trwy ryfedd eironi, pe cai ei hethol yn arweinydd a llwyddo i berswadio pobl yn y cymoedd i ethol ACau Plaid Cymru, yna byddai o ganlyniad yn colli ei sedd ei hun. Run fath i Llyr. Ar y llaw arall mae etholaethau Dafydd El ac Elin yn gymharol ddiogel.

Dyna’r wir broblem. Ond efallai y caiff y drefn etholaethol a’r dull o ethol ACau ei newid.

Ifor Hughes 24 Tachwedd 2011, 23:29

A gallaf ofyn i Leila Map defynndio ei henw cywir yn unol a chanllawiau Golwg 360 – as if bod yna rywun go iawn gyda’r fath enw a Leila Map ! Bron mor wirion ag Engelbert Humperdinck.

“Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau”.

Leila Map a’i brawd Poke A’Globe

Ifor Hughes 24 Tachwedd 2011, 23:33

Ffred – Peter Hain ddaeth lan ar ‘nonsense’ yna o ran spite ac i gadw pobl fel Wigley & Ron Davies mas. Smo’r drefn hynny’n bodoli’n yr Alban na Gogledd Iwerddon a chan nad Llafur sy’n San Steffan bellach dylid newid e .

Andrew 25 Tachwedd 2011, 00:04

Mae eisiau rhywun fydd yn apelio at Gymru gyfan, Mae’r Sais wedi perffeithio tacteg rhannu a rheoli (neu beth bynnag yw ’divide and rule’ yn Gymraeg) ac wedi cadw’r Gogs a’r Hwntws a’r Cymry Cymraeg a’r di-Gymraeg yn erbyn eu gilydd dros y canrifoedd. Mae angen tynnu pawb at eu gilydd ac efallai fod gan Leanne Wood y cefndir i wneud hynny, h.y. mae’n medru’r iaith (ticio blychau y Cymru Cymraeg) ond yn dod o ardal lle mae Llafur yn draddodiadol gryf. Ond mae gan rai o’r lleill eu rhinweddau hefyd- Elin Jones yn dangos fod ganddi’r asgwrn cefn i wneud penderfyniadau anodd gydag achos difa moch daear, a Dafydd Ellis-Thomas a’r ‘gravitas’ sydd ei angen mewn arweinydd gwleidyddol. Mae ’na dalent yn y blaid- cyfle i greu ‘dream team’ er mwyn symud Cymru ymlaen.

Gareth 25 Tachwedd 2011, 08:48

“os nad yw’n gyffyrddus yn ei siarad yn gyhoeddus, nid oes angen iddi.”

Beth bynnag yw enw iawn Leila Map, rwy’n MAWR obeithio nad aelod o Blaid Cymru sy’n cuddio y tu ol iddo gyda’r fath sylw a hynna! Mae hi’n amlwg i bawb nad oedd IWJ yn “gyffyrddus” yn siarad Saesneg, ond fel arweinydd plaid mewn gwlad ddwyieithog, roedd yn rhaid iddo. Mae esgusodi arweinydd potensial arall rhag gorfod ymdrafferthu i siarad Cymraeg, a hithau wedi gwneud ymdrech anhygoel i’w dysgu, yn datgelu gwirioneddau cwbwl afiach am feddylfryd pwy bynnag yw Leila Map. Statws y Gymraeg, Leila Map? Fydd hi byth byth yn iaith gwbl swyddogol gyda gwerth a pharch iddi yn ei gwlad ei hun yn ol eich syniadau gwyrdroedig chi. Cadwch nhw i chi’ch hun. Does dim lle iddynt yma. Rydych yn hen ffasiwn ac yn sarhad.

Andrew 25 Tachwedd 2011, 09:23

Fe hoffwn i weld arweinydd a fydd yn apelio at Gymru gyfan, boed nhw’n Gogs neu Hwntws, yn Gymraeg neu ddi-Gymraeg- mae’r Sais wedi perffeithio’r dacteg o rannu a rheoli (neu beth bynnag yw ’divide and rule’ yn Gymraeg) ers canrifoedd ac mae eisiau rhywun i ymrafael a hyn yn ogystal a materion fel yr economi, addysg a iechyd ayyb. Mae Leanne Wood yn ticio’r blychau fan hyn- yn siarad Cymraeg ond yn dod o ardal sy’n draddodiadol Lafur. Ond mae angen rhinweddau eraill hefyd. Mae angen tipyn o asgwrn cefn (Elin Jones yn sgorio’n dda fan hyn drwy wneud y penderfyniad anodd i ddifa moch daear) ac hefyd tipyn o ‘gravitas’ (Dafydd Elis-Thomas yn sgorio fan hyn). Mae gan Plaid bobl talentog a’r potensial i greu tim da i symud Cymru ymlaen.

Iwan Rhys 25 Tachwedd 2011, 10:36

I ateb Gareth, onid yr hyn ry’n ni’n ymdrechu ato yw bod y DEWIS yn bodoli i ddefnyddio’r Gymraeg ym mhob maes? Os felly, rhwydd hynt i’r gwleidyddion DDEWIS defnyddio pa bynnag iaith y maen nhw eisiau ar y pryd.

Byddai’n well gen i glywed Leanne yn dadlau a gweithredu o blaid hawliau ieithyddol drwy gyfrwng y Saesneg na chlywed Dafydd El, neu unrhyw un arall, yn dadlau a gweithredu yn eu herbyn drwy gyfrwng y Gymraeg!

Wrth gwrs, yn ddelfrydol, byddai arweinydd Plaid Cymru yn gallu siarad y ddwy iaith ac yn dewis defnyddio’r ddwy iaith yn rheolaidd. A chan fod Leanne wedi gwneud ymdrech arbennig i ddysgu’r Gymraeg cystel, dwi’n gwbl ffyddiog y bydd hi’n dewis defnyddio’r ddwy iaith yn rheolaidd.

Iwan Rhys 25 Tachwedd 2011, 10:44

A chan ymateb i neges olaf Gareth, dwi’n credu dy fod di wedi camddeall neges Leila Map yn llwyr ynglyn â’r jwg – mae hi’n dweud (dwi’n credu) bod Comisiwn y Cynulliad yn trin y Gymraeg fel tase hi’n jwg ar seld, ac mae hi’n anghytuno gyda hynny. Mae dy neges di Gareth yn gwneud cam â hi.

Ifor Hughes 25 Tachwedd 2011, 10:53

Ma Iwan yn gwbwl iawn Gareth wyt ti wedi camddeall Leila Map yn llwyr .

Gareth 25 Tachwedd 2011, 11:56

Ydw, ydw, dwi’n deall, ac yn gyfarwydd â’r dyfyniad. OND mae hynny’n mynd yn hollol groes i’w sylw ar y stori hon, sef “os nad yw’n gyffyrddus yn ei siarad yn gyhoeddus, nid oes angen iddi.” Nid ydw i yn “gyffyrddus” yn siarad Saesneg, ac mae llawer o Gymry’r un fath a mi, ond mae’n rhaid derbyn, mewn gwlad ddwyieithog, fod hynny’n anochel. Pam dweud nad yw’n angenrheidiol i arweinydd posib PC wneud yr un fath y ffordd arall rownd, a hithau WEDI DYSGU CYMRAEG? Ai gwastraff amser oedd iddi wneud hynny, os yw cefnogwyr yn ddigon hapus iddi beidio? Ai jwg ar seld yn unig yw’r Gymraeg – ticio’r bocs eich bod WEDI dysgu ac YN gefnogol, ond does dim rhaid ei DEFNYDDIO wrth gwrs – mae hynny’n afresymol. Dyna eironi ei dwy neges.

Gareth 25 Tachwedd 2011, 11:58

Gyda llaw, os nad ydych chi’ch dau yn gyfarwydd â’r dyfyniad:

Cei ganmol hon fel canmol jwg ar seld.
Ond gwna hi’n hanfod – ac fe gei di weld

Nid gwneud iaith yn hanfod yw peidio â gwneud y defnydd mwya posib ohoni ar lawr y Senedd.

Iwan Rhys 25 Tachwedd 2011, 12:21

Wel, dwi’n ffyddiog y bydd Leanne yn defnyddio’r Gymraeg fwyfwy yn y siambr wrth iddi fagu hyder, ac mae’i safiadau hi dros y Gymraeg a hawliau siaradwyr Cymraeg yn ail i neb ymhlith ein gwleidyddion.

Gareth 25 Tachwedd 2011, 14:11

Rydyn ni’n cytuno yn y bon. Rydw innau’n meddwl ei bod hi’n ymgeisydd posib cyffrous, gyda gweledigaeth, ac yn gobeithio (gyda hyder nid diffyg ffydd) y bydd yn defnyddio mwy a mwy o Gymraeg yn y Senedd, oherwydd os na wnaiff arweinydd Plaid Cymru hynny, yn sicr ni allwn ddisgwyl arweiniad gan neb arall, a bydd yr iaith yn farw yno ymhen llai na chenhedlaeth.

Huw 25 Tachwedd 2011, 14:34

Go ffor it Leanne!!!!!

Wnai fotio drosddot ti

CGT 25 Tachwedd 2011, 17:13

Ar ol gweld y sylwadau cadarnhaol yma – Leanne Wood sydd amdani ar gyfer fy mhleidlais i . Buasai gwybod fod ganddi gefnogaeth cryf aelodau o bob cwr o Gymru’n hwb iddi o ran defnyddio’r Gymraeg .

Rhys McKenzie 25 Tachwedd 2011, 17:26

Buasai i’n hapus dros ben i weld Leanne yn sefyll am lywyddiaeth y Blaid. Er i gyd o’i waith dda dros y flynyddoedd diwethaf, ni chredaf i fod gan Elin Jones y gallu i ysbrydoli neu’r syniadau fawr i symyd y Blaid ymlaen sydd ei angen mewn arweinydd newydd. A fel dywedodd un sylwadwr uchod, Dafydd El yw Dafydd El. ‘Nuff said.

Dwi’n gobeithio’n fawr fydd hi’n sefyll. Mae ganddi hi fy mhleidlais i beth bynnag!

Gerwyn Preis 25 Tachwedd 2011, 17:50

@CGT… wn i ddim am gefnogaeth gref o bob cwr o Gymru, ond yma yn Nhorfaen ar fy mhatshyn i bydde ganddi’r hygrededd i gymryd pleidleisia nol o’r Blaid lafur. Meddwl fase’r Gorllewin a’r Gogledd yn fwy plwyfol ag angen gwarchod yr ymgeiswyr mwy diogel a thraddodiadol…. Duw a’n helpo ni os bydd yr Arg yn cael unrhyw fath o bleidlais…..

CGT 25 Tachwedd 2011, 17:57

Un o’r Gogledd-Orllewin ydw i. Yn annfodus, mae nifer o AC’r Blaid bellach yn ‘Dead wood’ go iawn (Yn hytrach na Leanne Wood ! ) . Mae’n rhy gynna i Llyr Huws Gruffydd , a chredaf fod Simon Thomas wedi ei bardduo gyda’i fethiant anhygoel i gadw Ceredigion.
Mae Adam Price wedi oedi gyhyd y bydd wedi colli peth hygrededd gwleidyddol.

Crebwyll 25 Tachwedd 2011, 18:11

@ Gerwyn Preis ‘Meddwl fase’r Gorllewin a’r Gogledd yn fwy plwyfol ag angen gwarchod yr ymgeiswyr mwy diogel a thraddodiadol’?

Fel un arall o’r Gogledd-Orllewin mentraf broffwydo yn llawen a gobeithiol na fyddai sail i dy ofnau mewn unrhyw fodd yn y byd!

Gareth 25 Tachwedd 2011, 18:21

A minnau o’r Gorllewin – Leanne fyddai’n mynd a hi gen innau. Mae angen mynd am y dewis cyffrous weithiau!

Pan oeddwn i’n codi’r mater ynglyn a defnyddio’r Gymraeg yn y Senedd uchod, mynegi gobaith oeddwn i. Elin Jones, wrth gwrs fyddai fy ail ddewis. Byth bythoedd Ddafydd El!!

Leila Map 25 Tachwedd 2011, 22:57

Gareth: “… gobeithio (gyda hyder nid diffyg ffydd) y bydd yn defnyddio mwy a mwy o Gymraeg yn y Senedd, oherwydd os na wnaiff arweinydd Plaid Cymru hynny, yn sicr ni allwn ddisgwyl arweiniad gan neb arall, a bydd yr iaith yn farw yno ymhen llai na chenhedlaeth.”

deall y pryder, a chydymdeimlo. Ond dwi ddim yn gyffyrddus gyda’r syniad o orfodi dysgwr i siarad Cymraeg yn gyhoeddus, yn enwedig yng ngwres y frwydr wleidyddol ar lawr y Senedd…mae’n hollol wahanol i ddisgwyl cofnod o drafodaethau’r Cynulliad yn y ddwy iaith – mater o broses syml a hawl dynol ydy hynny.

Os na fedar y Cynulliad drin y Gymraeg yn gyfartal a theg, mae hi wedi canu arnom. Esiampl wael, gosod cynsail ayb.

Fydd yr iaith ddim yn marw yn y Cynulliad achos bod Arweinydd Plaid Cymru ddim yn siarad Cymraeg, mae’r aelodau o bob lliw gwleidyddol sy’n siarad y Gymraeg yn ysgwyddo’r cyfrifoldeb.

Mae angen pont rhwng y Cymry Cymraeg a’r di-Gymraeg, a beth well na dysgwraig frwd o’r Cymoedd sy’n deall pryderon y Werin?
Methodd cyfalafiaeth, mae’n amser gorseddu sosialaeth!

Gerwyn Preis 25 Tachwedd 2011, 23:45

@CGT, @crebwyll a @Gareth…. dwinna’n wreiddiol o’r Gogledd Orllewin ond wedi gadael ers coleg, ond ma dal gin i dylwyth gartre. Ma nhw rhywfaint yn ddrwgdybus o aelodau PC o’r cymoedd er mod i di ceisio’u darbwyllo ar ol byw yn eu plith cyhyd.!!

Crebwyll 26 Tachwedd 2011, 00:03

Ffydd fechgyn, ac undod, a gweledigaeth!

Crebwyll 26 Tachwedd 2011, 00:13

A ferched!

marc 26 Tachwedd 2011, 11:00

Mae gan Leanne weledigaeth ar gyfer Cymru sy’ wedi ei wreiddio yn nhraddodiadau gorau’r wlad – cydweithredu a chymunedau. Llwyddodd i asio gwaith DJ Davies, un o arloeswyr y Blaid, a Raymond Williams gyda’i gweledigaeth ei hun ar gyfer “Greenprint” i’r Cymoedd. Mae’n weledigaeth y byddai Cymru gyfan yn elwa ohono.
Y peth pwysica’ i mi yw gwybod y gall Leanne apelio at gefnogwyr newydd i’r Blaid. Pobl sydd am weld gwleidyddion o arddeliad ac egwyddorion efo tan yn eu boliau yn lle’r siwtiau llwyd llwgr sy’n llenwi meinciau San Steffan.
Nid ymgyrch o’r Cymoedd yn unig ydi hwn. Mae na ddigon o bobl yn y Gogledd Ddwyrain sydd am ei gweld hi’n llwyddo. Dwi’n credu fod na ddigon yn Y Fro fyddai am weld hynny hefyd.

Jon Tomos 26 Tachwedd 2011, 13:04

Rwy’n cytuno a’r mwyafrif o’r sylwadau.

Pwy fyddai’r blaid lafur yn ofni’r mwyaf? Leanne Wood, Elin Jones neu Dafydd Elis Thomas? Mae’r ateb yn weddol amlwg, amwn i. Leanne yw’r dewis gorau, a’r unig un allai ehangu apêl y blaid. Radicaliaeth ymarferol, dyna’r hyn mae hi’n ei gynnig yn hytrach na’r un hen ffordd reolaethol.

Gerwyn Preis 26 Tachwedd 2011, 13:12

Mae sylwadau @marc yn fy modloni yn fawr… croeswn fysedd a phob dim arall y bydd ei broffwydoliaeth yn troi’n realiti

GARETH 2 26 Tachwedd 2011, 16:23

Peidied neb a meddwl y bydd radicaliaeth Leanne Wood yn tanio trigolion y cymoedd. Yn y de a’r de ddwyrain ceir rhai o’r mwyafrifoedd mwyaf ceidwadol yn Nghymru. Ma nhw’n gysurus yn byw yn eu gorffennol. Newidia nhw ddim.

A thu hwnt i’r A465, croesawir radicaliaeth Leanne fel dos o wermod gan bawb a Phleidwyr fel ‘u gilydd. Dyna’r gwir.

Ble fydd ein cadarnleoedd wedyn? Calliwch, cyn pleidleisio, da chi.

John Griffith 27 Tachwedd 2011, 19:35

Mi fuasa’n well gennyf i Alex Salmond na unrhyw un arall sydd wedi ei enwi hyd yn hyn..

Ifor Hughes 30 Tachwedd 2011, 01:45

John Griffith – ma Salmond yn byw yn Scotland yr idiot – beth am ofyn i Mandela does gan y diawl diog yna ddim i’w wneud bellach.

Mae’r sylwadau wedi cau.

A fydd Leanne Wood yn sefyll?

Dyfalu ei bod hi am herio Elin Jones a Dafydd Elis-Thomas

Poblogaidd

Swyddi

Hwylusydd Prosiect

Asesydd Allanol – Iechyd a Gofal Cymdeithasol CC (Cymraeg yn Ddymunol)

Arolygydd Eiddo – Siaradwr Cymraeg

Is-ddatblygwr Meddalwedd

Swyddog Ardal Wledig (Dyffryn Conwy)

← Stori flaenorol

Bydd yr Alban yn cael pleidlais arall ar annibyniaeth – Ian Blackford

Stori nesaf →

Toriadau’r BBC ‘yn gwneud niwed i ddemocratiaeth’

Hefyd →

Cyfraniadau cyflogwyr at Yswiriant Gwladol: Galw am warchod y cyhoedd

50 sylw