Dyw’r Gweinidog Iechyd ddim yn difaru buddsoddi £166m yn sefydlu ysbytai maes yng Nghymru – a hynny, er bod y rhan fwyaf yn wag.
Dros y misoedd diwethaf mae 17 o ysbytai maes wedi cael eu codi ledled y wlad, yn ymateb i’r argyfwng coronafeirws.
Cawson nhw eu sefydlu i ddarparu rhagor o welyau i gleifion pe bai niferoedd achosion yn cynyddu’n ormodol, ond mae bellach wedi dod i’r amlwg mai dim ond un sydd wedi ei ddefnyddio.
Yn siarad am y mater brynhawn heddiw (dydd Iau 18 Mehefin), dywedodd Vaughan Gething nad oedd yn difaru eu sefydlu.
“Rydym yn gwybod y gall y coronafeirws ddychwelyd â brig arall,” medda mewn cynhadledd i’r wasg.
“Mewn rhannau eraill o’r byd sy’n symud tuag at y gaeaf mae yna ragor o achosion. Felly, ni fyddai’n synhwyrol, yn fy marn i, i ddatgymalu’r capasiti rydym wedi ei greu.
“Ond mae’n werth atgoffa ein hunain … ein bod wedi gwario £166m yn creu ysbytai maes yng Nghymru. Pe bawn i’n cael y cyfle eto, buaswn i dal yn creu ysbytai maes i roi rhagor o gapasiti i ni.”
Sylwadau “chwithig”
Yn ystod y gynhadledd, mi gododd cwestiwn am lythyr diweddar gan Ysgrifennydd Cymru, Simon Hart, at Aelodau o’r Senedd ac arweinwyr cynghorau Cymru.
Yn y llythyr mae’n galw arnyn nhw i roi pwysau ar Lywodraeth Cymru i gyhoeddi rhagor o fanylion ynghylch aildanio’r diwydiant dwristiaeth.
Mae Vaughan Gething wedi galw’i sylwadau yn “chwithig”.
“Mae Ysgrifennydd Cymru yn ddigon lwcus i beidio gorfod gwneud penderfyniadau yng Nghymru,” meddai.
“Dw i’n credu y byddai’n well i bob un ohonom pe bai Ysgrifennydd Cymru yn trafod â Llywodraeth Cymru mewn ffordd fwy adeiladol.”
Ailagor y siopau ddydd Llun?
Ers y gynhadledd, mae BBC Cymru Fyw wedi adrodd fod disgwyl i’r Prif Weinidog, Mark Drakeford, gyhoeddi yfory y caiff siopau ailagor ddydd Llun.
Bydd y Prif Weinidog yn gwneud ei gyhoeddiad am 12:30pm yfory, yng nghynhadledd newyddion ddyddiol Llywodraeth Cymru.
Ystadegau diweddaraf
Cyhoeddodd Iechyd Cyhoeddus Cymru heddiw fod pump yn rhagor wedi marw ar ôl profi’n bositif am Covid-19, gan fynd â chyfanswm nifer y marwolaethau i 1,471, tra bod cyfanswm yr achosion wedi cynyddu 48 i 14,970.
