Mae Mohammad Asghar, yr Aelod Ceidwadol o’r Senedd, wedi marw.
Cafodd ei gludo i’r ysbyty fore ddoe (dydd Mawrth, Mehefin 16) ar ôl i’r Gwasanaeth Ambiwlans gael eu galw.
Roedd e’n 74 oed, ac wedi cynrychioli De-ddwyrain Cymru ers 13 o flynyddoedd.
Roedd e’n cael ei adnabod wrth y ffugenw ‘Oscar’, a fe oedd yr Aelod Cynulliad cyntaf o gefndir croenddu ac ethnig lleiafrifol (BAME) i gael ei ethol i’r Cynulliad.
Bywyd a gyrfa
Cafodd Mohammad Asghar ei eni yn Peshawar, oedd yn rhan o India ar y pryd, yn 1945.
Fe oedd y cynghorydd Mwslimaidd cyntaf yng Nghymru, wrth gael ei ethol yn aelod o Gyngor Casnewydd.
Cafodd ei ethol yn Aelod Cynulliad rhanbarthol dros Blaid Cymru yn 2007, a hynny ar ôl cyfnodau’n aelod o’r Blaid Geidwadol a’r Blaid Lafur.
Fe symudodd at y Ceidwadwyr yn y Cynulliad yn 2009, yr Aelod Cynulliad cyntaf i “groesi’r llawr” yn y Senedd.
Cafodd ei enwi’n Wleidydd Mwslimaidd y Flwyddyn yn y Gwobrau Mwslimaidd Prydeinig yn 2014 a 2015.
Teyrngedau
“Mae hyn yn ergyd drom,” meddai Paul Davies, arweinydd y Ceidwadwyr Cymreig ar Twitter.
“Dw i’n sicr y bydd pawb yn ymuno â fi wrth ddanfon fy nghydymdeimlad i deulu @MohammadAsghar, yn enwedig ei wraig Firdaus a’i ferch Natasha, yr oedd e’n caru’r ddwy ohonyn nhw’n fawr iawn, ar adeg eu colled drasig.”
Yn ôl Simon Hart, Ysgrifennydd Cymru, mae “ei golli yn newyddion ofnadwy”.
“Bydd yn cael ei gofio’n annwyl a hoffwn fynegi fy nghydymdeimlad â theulu, ffrindiau ac etholwyr Mohammad,” meddai.
“Fel cynghorydd Mwslimaidd cyntaf a’r Aelod cyntaf o’r Senedd o dras ethnig lleiafrifol, roedd Mohammad Asghar yn ffigwr eithriadol o arwyddocaol yng ngwleidyddiaeth Cymru ac mae e wedi cyfrannu cymaint at ei gymuned a’r wlad ers ymgartrefu yma’n ddyn ifanc.”
Yn ôl Jane Dodds, arweinydd y Democratiaid Rhyddfrydol Cymreig, “roedd Mohammad yn ddyn angerddol nad oedd fyth wedi gadael i unrhyw beth ei ddal e’n ôl”.
Mae Adam Price, arweinydd Plaid Cymru, a Llywydd y Senedd, Elin Jones, hefyd wedi talu teyrnged iddo.
Rwyf i a Phlaid Cymru yn anfon ein cydymdeimlad dwysaf at deulu a ffrindiau Mohammad Asghar. Cofiwn Oscar am ei ymroddiad i bobl Dwyrain De Cymru a’i wasanaeth hir yn y Senedd.
— Adam Price (@Adamprice) June 16, 2020
Wedi fy nhristau gan farwolaeth sydyn ein cyfaill annwyl, Mohammad Asghar. Bydd yn golled enfawr i’r Senedd. Roedd yn ffrind i bawb ar draws y pleidiau ac yn bencampwr dros ei ranbarth a’i wlad.
— Y Llywydd (@yLlywydd) June 16, 2020
Mae Mark Drakeford, prif weinidog Cymru, hefyd wedi cyhoeddi teyrnged ddwyieithog iddo.
Trist iawn clywed am farwolaeth Mohammad Asghar.
Hoffaf gynnig fy nghydymdeimlad i’w deulu a’u ffrindiau ar yr amser anodd hwn.I am saddened to hear of Mohammad Asghar’s death.
My thoughts are with his family and friends today. His presence in the Senedd will be missed.— Mark Drakeford (@fmwales) June 16, 2020
