Mae Yes Cymru yn cefnogi ymgyrch i sicrhau bod emoji baner Llydaw ar gael yn barhaol i ddefnyddwyr y cyfryngau cymdeithasol.
Mae’r mudiad o blaid annibyniaeth i Gymru yn annog pobol i ddefnyddio’r hashnod #emojibzh “i ddangos bod digon o ddiddordeb” i gael y faner yn un o’r emojis parhaol.
Fe ddaw ar ôl i dudalen Twitter @emojibzh drydar yn gofyn am gefnogaeth.
Ar hyn o bryd, mae’r faner ar gael fel emoji tan Chwefror 9 er mwyn mesur faint o fynd sydd arni.
“Mae Llydaw eich angen chi” meddai neges ar y dudalen yn yr iaith Lydaweg.
“Mae emoji baner Llydaw yn weithredol hyd at 9 Chwefror 2020.
“Defnyddiwch yr hashnod #EmojiBZH ar Twitter er mwyn cefnogi creu yr unig emoji rydyn ni wir ei eisiau.”
Wrth alw am gefnogaeth, mae Yes Cymru yn cynnig nifer o eiriau yn y Llydaweg a’r Gymraeg, sef byd (bed), merch (merc’h), tŷ (ti), dŵr (dour), afal (aval).
