Plaid yn cael mwyafrif clir ar Gyngor Gwynedd

Adeilad Cyngor Gwynedd
Mae Plaid Cymru wedi ennill mwyafrif clir ar Gyngor Gwynedd unwaith eto ar ôl cipio dwy sedd mewn isetholiadau neithiwr.

Yn y ddau achos, fe lwyddodd ymgeiswyr y blaid i guro’u prif wrthwynebwyr, carfan Llais Gwynedd, gan godi nifer ei chynghorwyr i 39 allan o 75.

Yn 2008, roedd llwyddiant Llais Gwynedd yn etholiadau’r cyngor sir wedi mynd â mwyafrif clir y Blaid ond mae nifer o isetholiadau wedi adfer hwnnw.

Neithiwr, fe lwyddodd hi i gipio sedd Diffwys a Maenofferen ym Mlaenau Ffestiniog oddi ar Llais Gwynedd a chadw sedd Penrhyndeudraeth, lle’r oedd ei chyn gynghorydd wedi cael ei garcharu am ddwyn o’r swyddfa bost yr oedd y ei rhedeg.

Roedd y fuddugoliaeth i Gareth Thomas yno yn un glir, gyda mwyafrif o bron 300 ond roedd y frwydr yn glosiach yn Niffwys lle’r oedd hi’n frwydr ben-ben rhwng y ddwy blaid am sedd yr oedd Llais Gwynedd yn ei dal gyda phedair pleidlais.

Y canlyniadau

Dyma’r ddau ganlyniad:

Penrhyndeudraeth

515 Plaid Cymru (Gareth Thomas)

219 Llais Gwynedd (Rhian Jones)

90 Annibynnol (Dafydd Thomas)

Diffwys a Maenofferen

210 Plaid Cymru  (Mandy Williams-Davies)

153 Llais Gwynedd (Catrin Elin Roberts)