Colli ond perfformiad da

Methodd Rob Earnshaw a manteisio ar gyfle gorau Cymru

Lloegr 1 – 0 Cymru

Daeth gôl y Saeson wedi 35 munud o’r gêm – Ashley Young yn rhwydo wedi rhediad a chroesiad isel gan Stuart Downing.

Er tegwch i Gymru roedd yn hanner da i’r cochion a’r chwaraewyr i gyd yn edrych yn gyfforddus iawn.

Lloegr ddechreuodd orau, ond wedi’r deg munud cyntaf fe setlodd y Cymry a dechrau cadw’r bêl yn dda ymysg ei gilydd.

Dim ond hanner cyfleoedd ddaeth i gyfeiriad y Cymry – y gorau wedi rhediad a chroesiad gwych gan y capten Aaron Ramsey, ond methodd Joe Ledley a’i chyrraedd yn y postyn pellaf.

Rheolodd Lloegr ddeg munud olaf yr hanner ar ôl iddyn nhw sgorio a bydd Gary Speed yn weddol hapus i beidio ag ildio un arall.

Yr ail hanner

Dylai Gareth Bale fod wedi cael cyfle i ddod ar sgôr yn gyfartal yn fuan yn yr ail hanner wedi pas lletraws gan Ramsey. Dyfarnwyd fod yr asgellwr yn camsefyll, ond roedd yr ailchwarae’n dangos nad ydoedd mewn gwirionedd.

Daeth cyfle da cyntaf yr ail hanner i Loegr, ond ergydiodd Frank Lampard dros y trawst o ymyl y cwrt.

Penderfynodd Gary Speed ei bod yn amser cyflwyno Rob Earnshaw wedi 67 munud, gan gymryd lle Morison yn yr ymosod.

Roedd Cymru’n dal i chwarae pêl-droed hyderus gydag ugain munud yn weddill, ac roedd eu hwyliau’n cael eu hadlewyrchu gan y cefnogwyr Cymreig oedd mewn llais da trwy’r nos.

Cyfleoedd

Daeth cyfle i Bale o gic rydd wedi 75 munud, ond hedfan dros y traws wnaeth ei ergyd.

Cymru oedd yn pwyso erbyn hyn a dyfarnwyd cic rydd arall i’r ymwelwyr. Hwyliodd y bêl i’r postyn pellaf lle cafodd Blake rywbeth arni a disgynnodd y bêl o Earnshaw gyda rhwyd wag o’i flaen. Yn anffodus ergydiodd dros y trawst o chwe llath. Cyfle euraidd.

Daeth cyfle gwych arall i’r Cymry gyda 10 munud yn weddill wrth i Ramsey groesi i Gunter. Rheolodd yntau’n dda ac ergydio ond arbedodd Joe Hart yn wych wrth i chwiban y dyfarnwr chwythu am drosedd aneglur gan y Cymro.

Daeth cyfle arall i Earnshaw funudau’n ddiweddarach, ond crymanodd ei ergyd heibio’r postyn. Roedd Lloegr yn edrych yn anghyfforddus wrth i Gymru gynyddu’r pwysau.

Parhau gwnaeth pwysau’r Cymry am y munudau olaf ond doedd dim gôl i ddod ar nodon o gynnydd pellach i dîm Gary Speed.

Tîm Cymru: Hennessey, Gunter, Williams, Blake, Taylor, Bale, Crofts, Collison, Ramsey, Ledley, Morison

Eilyddion: Myhill, Danny Collins, James Collins, King, Allen, Robson-Kanu, Earnshaw.

Poblogaidd

Swyddi

Tinopolis

Cynhyrchydd (Dwy swydd)

Prifysgol Bangor

Cyfathrebwr Estyn Allan STEM (40% CALl)

Ofcom Cymru

Cynorthwyydd Materion Rheoleiddiol Ofcom Cymru

Prifysgol Bangor

Pennaeth y Gwasanaethau Cyfreithiol (Dros Gyfnod Mamolaeth)

Yr Eglwys yng Nghymru

Cyfarwyddwr Astudiaethau Caplaniaeth

Ombwdsmon Cymru

Swyddog Arweiniol Data

Golwg Cyf

Swyddog Prosiect Ymbweru Bro (ardal Wrecsam)

Menter a Busnes

Crëwr Cynnwys Digidol

Prifysgol Bangor

Tiwtor Cymraeg ar gyfer y Gweithlu Addysg

Cymdeithas Cyfieithwyr Cymru

Rheolwr Aelodaeth

← Stori flaenorol

Pêl-droed

Gofyn i gefnogwyr Abertawe gadw draw o’r Liberty

Abertawe’n herio Brentford fory (dydd Sul, Gorffennaf 26) wrth iddyn nhw geisio cyrraedd rownd derfynol gemau ail gyfle’r Bencampwriaeth.

Stori nesaf →

Cymru

Cymru’n colli ar yr hanner

Lloegr 1 – 0 Cymru

Hefyd →

Cymru

Fy Hoff Raglen ar S4C

Shaun Jones

Y tro yma, Shaun Jones o Ruthun, Sir Ddinbych sy’n adolygu’r rhaglen Gogglebocs Cymru

4 sylw

CGT 6 Medi 2011, 21:49

Dyna pam nad yw Earnshaw erioed wedi llwyddo ar y lefel uchaf.
Nid yw erioed wedi sgorio pan mae hi wirioneddol yn cyfri. Y fo ddaru fethu cyfle gwych yn erbyn Serbia yn mis Awst 2003 . Yr oedd Bryan Robson yn West Brom yn llygad ei le.
Wedi dweud hynny, fe fuaswn wedi cadw Morrison ar y cae a chwarae 4 -4- 2 . Gem addawol eto, ond beth yn union mae Joe Ledley’n cyfrannu i’r tim ?
Y canol cae delfrydol fuasai Collison, Vaughan , Ramsey , Bellamy a Bale. Mae hynny’n galluogi rhywun i chwarae
4-5-1 hyd at 4-4-2 . Ond mae angen i’r chwareawyr yma droi i fyny ar gyfer y gemau cyfeillgar hefyd .
Dwi’n siwr fod Ramsey’n morio ‘God Save the Queen ‘ .
Ymarfer ar gyfer cynrychioli Lloegr/Prydain yn 2012 .

Steffan Webb 6 Medi 2011, 22:51

Mae’n bosib bod Earnie wedi sgorio mwy na gweddill y tim gyda’u gilydd dyna pam mae e’n chwaraewr gwych fydd yn rhoi gobaith i ni bob tro.
Dwi’n gorfod gofyn be sy’n bod ar reolwyr Caerdydd – mae’n amlwg bod Darcy Blake hefyd yn wych ond pam nag yw e’n cael chwarae i Gaerdydd? Mae ein hamddiffyn ni lot yn well pan mae e’n chwarae ac mae’n debyg bod modd iddo gamu o ail dim caerdydd at y tim cenedlaethol yn weddol rhwydd. Oh wel, siwr bo fi ddim yn deall y pethau hyn!

CGT 6 Medi 2011, 23:01

Petai Earnie yn ’wych’, ni fuasai wedi bod yn ail ddewis cynifer o weithiau . Mae’n ffyddlon iawn i’w wlad, yn sicr, ond roedd pob un cyffyrddiad ganddo heno’n wallus. Y chwaraewyr sy’n rhoi gobaith i fi ydi’r rhai sy’n gallu sgorio . yn anffodus, ni fu’r un o’r rhai hynny gennym ers tro .
Mae Darcy Blake wedi bod yn agoriad llygad – mae ei chwarae safleol o’n well o dipyn na James Collins . Mae angen cadw’r uned amddiffynol yma gyda’i gilydd, arwahan efallai i Ricketts yn lle Taylor am flwyddyn neu ddwy.

Owain Schiavone 7 Medi 2011, 09:39

Mae Earnshaw’n sgoriwr greddfol, ond yn amlwg tydi o heb ei gwneud hi ar y lefel uchaf. Mae ’na reswm pam mai yn y Bencampwriaeth mae o wedi chwarae’r mwyafrif helaeth o’i bêl-droed. Mae ’na reswm hefyd pam nad yw wedi bod yn ddewis cyntaf i’r un o reolwyr Cymru.

Wedi dweud hynny, fyswn i ddim wedi dewis neb o’i flaen o i gael y cyfle yna neithiwr…ond yn anffodus mae pob chwaraewr yn methu cyfleoedd. Mae o wedi, a bydd yn parhau i fod yn was ffyddlon

Mae problem ymosodwr gan Gymru ar hyn o bryd. Mae Morison wedi gwneud yn iawn dros y ddwy gêm ond mae o’n chwaraewr amrwd iawn. Roedd canol y cae’n dda iawn (cytuno mai Ledley oedd yr unig wendid) ac mae Blake wedi bod yn agoriad llygad yng nghanol yr amddiffyn.

Yn bersonol, dwi’n meddwl bod Taylor wedi bod yn wych dros y ddwy gêm. Sgen i ddim lot o amser i Ricketts

Mae’r sylwadau wedi cau.