Mae dyn 27 oed wedi marw yn dilyn ymosodiad y tu allan i glwb nos ym Mangor yn oriau man bore Sadwrn.
Mae adroddiadau lleol yn dweud mai Henry Esin yw’r dyn sydd wedi marw.
Mae dyn 26 oed a gafodd ei arestio’n dilyn yr ymosodiad bellach wedi cael ei arestio ar amheuaeth o lofruddio.
Cafodd yr heddlu eu galw i ardal clwb nos Peep toc cyn 2 o’r gloch fore Sadwrn, lle cawson nhw hyd i’r dyn yn anymwybodol.
Cafodd ei gludo i’r ysbyty, lle bu farw’r bore ma.
Henry Esin
Mae teyrngedau wedi’u rhoi i Henry Esin, oedd yn chwarae pêl-droed i Lanfairpwll.
Ar eu tudalen Facebook, dywedodd y clwb ei fod yn “fonheddig ym mhob ystyr”.
Apêl
Mae ymchwiliad ar y gweill, ac mae Heddlu’r Gogledd wedi apelio am dystion.
Dywedodd llefarydd ar ran yr heddlu eu bod yn “parhau i weithio gyda deiliaid trwyddedau, busnesau ac asiantaethau sy’n bartneriaid i atal y fath ddigwyddiadau trasig”.
