Prif Weinidog Cymru fydd yn arwain cyfarfod cyntaf y Grŵp Cynghori ar Ewrop heddiw i drafod oblygiadau’r bleidlais i adael yr Undeb Ewropeaidd ar Gymru.
Ysgrifennydd y Cabinet dros Gyllid, Mark Drakeford, ydy cadeirydd y grŵp, a dan arweiniad Carwyn Jones mae disgwyl iddyn nhw ystyried sut y gall Cymru “barhau i weithio’n gadarnhaol gydag Ewrop.”
Nid gwleidyddion yw unig aelodau’r grŵp sy’n cynnwys arweinwyr busnes, cynrychiolwyr o brifysgolion, colegau, undebau llafur, y byd amaeth, gwasanaethau cyhoeddus a’r trydydd sector.
Marchnad Sengl – ‘mynediad llawn a dilyffethair’
“Rhaid i Gymru, ynghyd â phob un o’r gwledydd datganoledig, chwarae rhan lawn, weithredol yn y trafodaethau ar ymadawiad y Deyrnas Unedig o’r Undeb Ewropeaidd er mwyn sicrhau bod ein buddiannau yn cael eu gwarchod yn llawn,” meddai Carwyn Jones cyn y cyfarfod.
“Mae hyn yn cynnwys diogelu mynediad llawn a dilyffethair at y Farchnad Sengl er mwyn diogelu ein heconomi, a sicrhau ar yr un pryd nad yw gadael yr Undeb Ewropeaidd yn cael ei ddefnyddio fel cyfle i gymryd cam yn ôl ar faterion pwysig fel gwarchod hawliau gweithwyr.”
‘Yn y fantol’
Yn ôl Mark Drakeford, “mae ffyniant a chyfeiriad Cymru yn y dyfodol yn y fantol.
“Mae’r materion hyn yn llawer dyfnach na buddiannau unrhyw blaid neu Lywodraeth benodol. Does dim modd i unrhyw unigolyn neu grŵp hawlio monopoli ar syniadau da, ac rydyn ni’n croesawu’r cyfle hwn i fanteisio ar gyngor y grŵp,” meddai.
Mae aelodau’r Grŵp Cynghori ar Ewrop yn cynnwys:
- Phil Bale, Arweinydd Cyngor Dinas Caerdydd
- Kevin Crofton, Llywydd, SPTS Technologies Ltd
- Richard B. Davies, Is-ganghellor Prifysgol Abertawe
- Jill Evans, Aelod o Senedd Ewrop
- Nathan Gill, Aelod o Senedd Ewrop
- David Jones, Prif Weithredwr Coleg Cambria
- Emyr Jones Parry, Llywydd Prifysgol Aberystwyth
- Hywel Ceri Jones, Cyn-lysgennad cyllid yr UE yng Nghymru
- Tom Jones, Pwyllgor Economaidd a Chymdeithasol Ewrop
- Yr Arglwydd Kinnock, Cyn is-lywydd y Comisiwn Ewropeaidd
- Martin Mansfield, Ysgrifennydd Cyffredinol, TUC Cymru
- Ruth Marks, Prif Weithredwr Cyngor Gweithredu Gwirfoddol Cymru
- Eluned Morgan AC, Cyn-aelod o Senedd Ewrop
- William Powell, Cadeirydd y Grŵp Trawsbleidiol ar Ewrop yn ystod y pedwerydd Cynulliad
- Colin Riordan, Llywydd ac Is-ganghellor, Prifysgol Caerdydd
- Kevin Roberts, Cadeirydd y Bwrdd Partneriaeth Amaeth
- Kay Swinburne, Aelod o Senedd Ewrop
- Derek Vaughan, Aelod o Senedd Ewrop
- Emma Watkins, Cyfarwyddwr CBI Cymru
