Efa Gruffudd Jones
Bydd trefn newydd o ddysgu Cymraeg i oedolion yn cael ei lansio ar faes y Brifwyl yn y Fenni y prynhawn yma.
Y Ganolfan Dysgu Cymraeg Genedlaethol yw’r corff newydd sy’n gyfrifol am y gwaith o yfory ymlaen, ac fe fydd digwyddiad anffurfiol ym Maes ‘D’ am 2.00 o’r gloch.
Bydd y drefn newydd yn adeiladu ar y gwaith wnaed hyd yma gan y chwe Chanolfan Cymraeg i Oedolion.
Meddai Efa Gruffudd Jones, Prif Weithredwr y Ganolfan Dysgu Cymraeg Genedlaethol: “Dyma’r tro cyntaf i gorff cynllunio cenedlaethol gydlynu’r ddarpariaeth Cymraeg i Oedolion ac mae ein nod yn glir – denu dysgwyr newydd i’r Gymraeg a chynyddu’r niferoedd sy’n defnyddio’r iaith bob dydd.
“Rwy’n edrych ymlaen yn fawr at gydweithio gyda darparwyr a thiwtoriaid ymroddedig ledled Cymru wrth i ni fynd ati i gydlynu’r ddarpariaeth, a bod yn bwynt cyswllt canolog ar gyfer yr holl wybodaeth am ddysgu’r Gymraeg.”
Cyrsiau ledled Cymru
Bydd 11 o sefydliadau yn gweithredu ar ran y Ganolfan Dysgu Cymraeg Genedlaethol i ddarparu cyrsiau mewn gwahanol rannau o Gymru:
- Prifysgol Bangor a Grŵp Llandrillo Menai: Môn, Gwynedd a Chonwy
- Coleg Cambria a chwmni Popeth Cymraeg: Sir Ddinbych, Sir y Fflint, Wrecsam
- Prifysgol Aberystwyth: Ceredigion, Powys a chyrsiau dwys a chyfunol a chyrsiau ar gyfer Lefelau Uwch a Hyfedredd yn Sir Gaerfyrddin
- Cyngor Sir Gâr: Cyrsiau wythnosol ar gyfer Lefelau Mynediad, Sylfaen a Chanolradd, gan gynnwys cyrsiau Cymraeg i’r Teulu, yn Sir Gaerfyrddin
- Cyngor Sir Benfro: Sir Benfro
- Prifysgol Abertawe: Abertawe a Chastell Nedd a Phort Talbot
- Cyngor Bro Morgannwg: Bro Morgannwg
- Prifysgol Caerdydd: Dinas Caerdydd
- Prifysgol De Cymru: Rhondda Cynon Taf, Merthyr Tudful, Pen-y-bont ar Ogwr
- Coleg Gwent: Casnewydd, Blaenau Gwent, Caerffili, Torfaen a Sir Fynwy
- Nant Gwrtheyrn: cyrsiau preswyl ar gyfer pob Lefel yng nghanolfan iaith a threftadaeth y Nant ym Mhen Llŷn.
