Atomfa bresennol Wylfa (Llun: Golwg360)
Mae’r problemau tros gostau trydan mewn atomfa newydd yn Lloegr yn codi mwy o amheuon tros godi gorsaf niwclear yn Ynys Môn hefyd, yn ôl ymgyrchwyr.
Mae’r diwydiant niwclear yn colli tir, meddai Dylan Morgan, o’r mudiad gwrth-niwclear PAWB yn sgil adroddiad gan y Swyddfa Archwilio Genedlaethol.
Mae hwnnw’n awgrymu y bydd y gost i Lywodraeth Prydain o roi arian ar ben pris y farchnad am drydan yn codi i bron £30 biliwn tros oes atomfa arfaethedig Hinkley C yng Ngwlad yr Haf.
‘Gwallgo’
“Mae’r costau yn gwbl wallgo,” meddai Dylan Morgan. “Mae economeg y peth yn mynd yn fwy gwallgo o hyd.
Roedd adroddiad arall wythnos yn ôl wedi awgrymu y byddai cost codi Hinkley C hefyd yn codi’n ddychrynllyd ac mae PAWB yn credu y bydd hynny’n codi ofn ar gwmnïau Hitachi a Horizon wrth ystyried codi atomfa newydd yn Wylfa ym Môn.
“Pwy yn ei iawn bwyll sydd eisiau rhoi ei arian i mewn i bwll diwaelod,” meddai Dylan Morgan.
