Fe fydd yna ddathlu mawr yn un o fwytai Caerdydd nos Fercher os yw Portiwgal yn llwyddo i guro Cymru a chyrraedd rownd derfynol Ewro 2016.
Mae Madeira Restaurante lain a milltir i ffwrdd o Stadiwm Principality yn y brifddinas, lle bydd un o ffanbarthau Cymru’n croesawu 27,500 o gefnogwyr i wylio’r gêm ar sgrin fawr.
Agorodd y bwyty Portiwgeaidd 18 o flynyddoedd yn ôl ac mae ganddo enw da eisoes am ddathliadau penblwyddi.
Ond mae’n bosib na fydd eu staff, o leiaf, yn dathlu pe bai Cymru’n ennill.
‘Lletchwith’
Dywedodd y rheolwr, Lucia Fodil: “Mae’n mynd i fod yn eitha lletchwith heno gan y byddwn ni ar agor pan fo’r gêm ymlaen.
“Byddwn ni’n cadw llygad ar y gêm drwy’r amser, ond mae’n bosib y bydd rhaid i ni ddathlu’n dawel bach os ydyn ni’n sgorio.”
I rai, meddai, bydd y profiad o wylio’r ddwy wlad yn herio’i gilydd yn ennyn teimladau cymysg.
“Mae pawb yn Madeira wedi bod yn cefnogi’r ddau dîm drwy gydol y twrnament.
“Er i fi gael fy ngeni a’m magu ym Mhortiwgal, rwy wedi byw yng Nghymru ers 26 o flynyddoedd ac yn ystyried fy hun yn Gymraes.
“Wrth gwrs ein bod ni am weld Portiwgal yn cyrraedd y ffeinal, ond fyddai hi ddim yn ddiwedd y byd pe bai Cymru’n mynd drwodd.
“Maen nhw wedi bod yn wych drwy gydol y twrnament ond dw i’n dal i feddwl y gwnawn ni ennill o 1-0.”
