Sean Buckley
Mae dyn wedi cael ei garcharu am oes ar ol ei gael yn euog o lofruddio plentyn 17 mis oed ei gariad.
Bydd yn rhaid i Sean Buckley, 28, o Donypandy dreulio o leiaf 17 mlynedd dan glo.
Bu farw Finley John Thomas ar ôl cael anafiadau difrifol i’w ben a thorri ei asennau ar 24 Medi, 2013.
Roedd Sean Buckley wedi honni bod y bachgen bach wedi syrthio i lawr y grisiau ar ôl i barafeddygon ddod o hyd iddo’n ddiymadferth.
Ond fe ddarganfu meddygon yn ddiweddarach bod Finley wedi dioddef gwaedlif i’w ymennydd a bod ganddo anaf arall y tu ôl i’w glust.
Yn Llys y Goron Caerdydd, dywedodd Roger Thomas QC ar ran yr erlyniad bod yr ymosodiad yn “fwriadol a milain.”
Roedd ei anafiadau yn anarferol i blentyn a oedd wedi syrthio i lawr y grisiau, meddai.
Yn ogystal â’i gael yn euog o lofruddiaeth, cafwyd Buckley hefyd yn euog o achosi creulondeb i blentyn.
Roedd mam Finley, Chloe Thomas, 25, eisoes wedi cyfaddef achosi creulondeb i blentyn.
Wrth ei ddedfrydu heddiw dywedodd y barnwr Mrs Ustus Frances Patterson bod Buckley yn berson “creulon” a’i fod “wedi bwriadu achosi niwed i blentyn hollol ddiniwed” pan darodd cadair yn erbyn pen Finley.
