Mae gan Gymru’r nifer fwyaf o achosion o ddiffyg ar y galon nag unrhyw wlad arall yn y DU, yn ôl ffigurau gan y British Heart Foundation (BHF) Cymru.
Yn ôl y ffigurau diweddaraf mae mwy na 30,000 o bobl yng Nghymru wedi cael diagnosis o ddiffyg ar y galon.
Mae’r elusen wedi datgelu bod pobl yng Nghymru yn fwy tebygol o ddioddef diffyg ar y galon nag unrhyw wlad arall yn y DU.
Mae diffyg ar y galon yn cael ei achosi gan amlaf gan drawiad y galon sy’n achosi niwed i gyhyr y galon na ellir ei wella. Mae’n golygu nad yw gwaed yn cael ei bwmpio o gwmpas y corff yn ddigon effeithlon.
Mae’r symptomau cynnwys blinder, bod yn fyr eich anadl a chadw dŵr.
Fe fydd hyd at draean o gleifion sy’n mynd i’r ysbyty gyda diffyg ar y galon yn marw o fewn 12 mis.
Er bod ’na feddyginiaethau ar gael i reoli’r cyflwr a’r symptomau, nid oes gwellhad a’r unig obaith i rai gyda mathau difrifol o’r cyflwr yw cael trawsblaniad y galon er mwyn achub eu bywyd.
£1m ar gyfer gwaith ymchwil
Mae BHF Cymru wedi derbyn £1 miliwn yn ddiweddar ar gyfer gwaith ymchwil ym Mhrifysgol Caerdydd sy’n cael ei arwain gan yr Athro Alan Williams er mwyn darganfod sut mae nam yng nghelloedd cyhyr y galon yn arwain at rythm anarferol.
Dywedodd Dr Chris George a Dr Lowri Thomas ym Mhrifysgol Caerdydd: “Mae pobl sydd â diffyg ar y galon mewn sefyllfa enbydus.
“Trwy wneud gwaith ymchwil rydym ni eisiau rhoi gobaith a gwell safon byw i bobl gyda chyflyrau fel diffyg ar y galon, a rhoi gobaith i’w hanwyliaid hefyd.”
Yn ystod mis Mehefin fe fydd BHF yn codi ymwybyddiaeth am y cyflwr ac yn ôl yr elusen mae angen gwneud llawer iawn mwy o waith ymchwil i ddiffyg y galon ar frys er mwyn helpu’r miloedd o ddioddefwyr yng Nghymru.
