Apêl o’r newydd am ddyn sydd ar goll

Michael Bryn Jones (llun gan Heddlu Gogledd Cymru)
Mae Heddlu Gogledd Cymru wedi lansio apêl o’r newydd am wybodaeth ynghylch dyn sydd wedi bod ar goll ers bron i ddeufis.

Cafodd Michael Bryn Jones, o Landudno, ei weld ddiwethaf ar gyffordd 11 (One Stop) ar yr A55 ar gyrion Bangor tua 5.45am ar 3 Ebrill.

Roedd wedi bod yn Ysbyty Gwynedd ym Mangor yn ystod oriau mân y bore hwnnw.

Roedd yn gwisgo jîns glas, siaced las llachar gyda llewys glas tywyll a het wlân wen.

Meddai’r Prif Arolygydd Mark Armstrong, sy’n arwain yr ymchwiliad i’w ddiflaniad:

“Mae bron i ddeufis ers i Michael gael ei weld diwethaf, ac nid yw wedi cysylltu â neb, ac felly ni allwn olrhain ei symudiadau y tu hwnt i’r ardal hon o’r A55.

“Nid yw chwiliadau manwl sydd wedi’u cynnal gan y Cŵn Chwilio ac Achub (BIRD), y Llu Awyr Brenhinol, Gwylwyr y Glannau a hofrennydd yr Heddlu wedi dod o hyd i unrhyw wybodaeth newydd i’n helpu.”

“Rwyf mewn cysylltiad rheolaidd â theulu Michael, ac maent eisiau eu mab, brawd a ffrind adref.”

Fe ychwanegodd Brif Arolygydd Armstrong: “Hoffwn apelio ar unrhyw un sydd â gwybodaeth fyddai’n ein helpu ni i ddod o hyd i Michael, a sicrhau ei fod yn dod adref at ei deulu, i gysylltu â’r Heddlu ar 101 neu’r elusen Pobl ar Goll.”