Leanne Wood, arweinydd Plaid Cymru Llun: Plaid Cymru
Mae Leanne Wood wedi cyhoeddi pwy sydd yng nghabinet cysgodol newydd Plaid Cymru yn y Cynulliad.
Dywedodd yr arweinydd ei bod hi wedi dewis “tîm cryf” i sicrhau addewidion maniffesto’r blaid ac i graffu ar lywodraeth leiafrifol y Blaid Lafur.
Mewn datganiad, dywedodd Leanne Wood: “Mae hwn yn dîm cryf a rhagorol i gyflawni dros bobl a chymunedau yng Nghymru.
“Rwyf wedi rhoi addewid i wneud yn siŵr mai Plaid Cymru fydd yr wrthblaid fwyaf effeithiol yn hanes Cynulliad Cenedlaethol Cymru. Mae gan y tîm hwn y gallu, y grym a’r profiad i gadw at yr addewid hwnnw.
“Gyda’n gilydd, rydym yn edrych ymlaen at ddwyn y llywodraeth i gyfrif ac at wneud y mwyaf o’r cyfleoedd fydd yn codi dros y pum mlynedd nesaf. Rydym eisoes wedi dangos i’r Llywodraeth leiafrifol na allant weithredu fel petai ganddynt fwyafrif.
“Rydym wedi gosod ein blaneoriaethau yn wythnosau cyntaf y pumed Cynulliad. Dros y pum mlynedd nesaf byddwn yn ymdrechu fel tîm i osod y sylfeini ar gyfer cynnydd ein cenedl.
“Wnawn ni ddim derbyn yr ail orau i’n cenedl ac yr ydym yn fwy na pharod i ddefnyddio ein dylanwad yn y Siambr i gyflwyno’r newid trawsnewidiol y bu Cymru’n crefu amdano ers blynyddoedd.
“Rwyf yn edrych ymlaen at weld busnes y Cynulliad yn cychwyn o ddifrif er mwyn i ni gael bwrw ati.”
Y tîm yn llawn:
Addysg, Plant, Sgiliau a Dysgu Gydol Oes: Llŷr Huws Gruffydd
Iechyd a Gofal Cymdeithasol: Rhun ap Iorwerth
Busnes, Economi a Chyllid: Adam Price
Ynni, Newid Hinsawdd a Materion Gwledig: Simon Thomas
Llywodraeth Leol, yr Iaith Gymraeg, Cydraddoldeb a Chynllunio: Siân Gwenllian
Tai, Tlodi a Chymunedau (a dur): Bethan Jenkins
Chwaraeon a Thwristiaeth: Neil McEvoy
Cadeirydd a Chomisiynydd Grŵp y Blaid, Diwylliant a Seilwaith: Dai Lloyd
Mesur Cymru a’r Cyfansoddiad: Dafydd Elis Thomas
Materion Allanol, Materion Nas Datganolwyd, yr Heddlu, y System Cyfiawnder Troseddol a Nawdd Cymdeithasol: Steffan Lewis
