Etholiadau’r Cynulliad: Cefnogaeth i’r Ceidwadwyr yn pylu

Wrth i gefnogaeth y Ceidwadwyr Cymreig wanhau, mae Plaid Cymru wedi camu i’r ail safle yn y pôl piniwn diweddaraf ynglŷn ag etholiadau’r Cynulliad ym mis Mai.

Llafur Cymru sy’n parhau i fod ar y blaen o fwy na 10% o’r bleidlais, gyda 35%, gyda’r pôl hefyd yn awgrymu y bydd Ukip yn ennill sawl sedd am y tro cyntaf.

Mae’r pôl diweddaraf yn dangos bod cefnogaeth y blaid Geidwadol yng Nghymru wedi cwympo 3%, tra bod Ukip wedi elwa o 2%.

Bydd yr arolwg hefyd yn halen ar y briw i’r Democratiaid Rhyddfrydol, gyda’i chefnogaeth bellach ar 6%.

Tra nad oes newid un ffordd na’r llall yn ei chefnogaeth ers y mis diwethaf, mae’n parhau i fod ymhell y tu ôl i UKIP, sydd bellach ar 17%.

Plaid Cymru i gipio dwy sedd?

Yn ôl yr Athro Roger Scully, cyfarwyddwr yr arolwg, mae’n dangos y gall Blaid Cymru gipio sedd Llanelli o Lafur a chipio Gorllewin Caerfyrddin a Sir Benfro o ddwylo’r Ceidwadwyr.

Tra byddai’r Democratiaid Rhyddfrydol Cymreig yn mynd â sedd Canol Caerdydd oddi ar Lafur Cymru os bydd y pôl yn gywir.

“Llafur yw’r ceffyl blaen o hyd. Ond mae lefelau ei chefnogaeth lawer yn llai o le oedd ar yr un adeg o’r cylch etholiadol bum mlynedd yn ôl,” meddai’r Athro Roger Scully.

Mewn arolwg barn gan YouGov yn 2011, roedd Llafur Cymru ar 49% o’r bleidlais etholaeth a 44% ar y bleidlais ranbarthol, sy’n dangos ei bod ar hyn o bryd yn rhedeg 14 pwynt yn is na lle oeddent y llynedd, meddai’r Athro Scully.

Ac er bod Plaid Cymru yn ennill tir yn y pleidleisiau etholaeth, mae ei chefnogaeth wedi cwympo rhywfaint yn y bleidlais ranbarthol.

“Prin yw’r #PlaidSurge y mae ei chefnogwyr yn breuddwydio amdano,” meddai.

O ran y Ceidwadwyr, dywedodd yr Athro Scully mai anawsterau’r blaid ar lefel Brydeinig oedd ar fai am gael rhyw faint o effaith ar ragolygon y Torïaid yn etholiad y Cynulliad.

Dyma’r canlyniadau llawn, gyda’r newid mewn cromfachau ers yr arolwg diwethaf a gafodd ei gynnal mis yn ôl.

Pleidlais etholaeth

Llafur: 35% (+1)

Plaid Cymru: 21% (dim newid)

Ceidwadwyr: 19% (-3)

UKIP: 17% (+2)

Democratiaid Rhyddfrydol: 6% (dim newid)

Eraill: 3% (dim newid)

Pleidlais ranbarthol

Llafur: 31% (dim newid)

Ceidwadwyr: 20% (-2)

Plaid Cymru: 20% (-2)