Darren Millar yw arweinydd newydd y Ceidwadwyr Cymreig yn y Senedd

Darren Millar yw arweinydd newydd y Ceidwadwyr Cymreig yn y Senedd.

Wnaeth neb sefyll yn ei erbyn i olynu Andrew RT Davies, oedd wedi cyhoeddi ei ymddiswyddiad yr wythnos hon, er iddo fe ennill pleidlais hyder ymhlith Aelodau Ceidwadol o’r Senedd o naw i saith.

Cafodd enwebiad Darren Millar sêl bendith pob un o’i bymtheg cyd-Aelod yn y Senedd.

Mae David TC Davies, cyn-Ysgrifennydd Gwladol Cymru, wedi’i benodi’n Bennaeth Staff Darren Millar.

Er gwaetha’i rôl newydd yn y Senedd, dydy Darren Millar ddim yn arweinydd y Ceidwadwyr Cymreig fel plaid.

Undod

“Dw i’n falch o gyhoeddi bod Darren Millar AoS wedi’i ethol heb wrthwynebiad yn arweinydd newydd Grŵp y Ceidwadwyr Cymreig yn Senedd Cymru,” meddai Bernard Gentry, cadeirydd y blaid.

“Dros y misoedd diwethaf, rydyn ni wedi bod yn ennill nifer o is-etholiadau llywodraeth leol ledled Cymru, ac mae ein diwrnodau gweithredu wedi recriwtio cannoedd o wirfoddolwyr ac ymgyrchwyr newydd.

“Gan gydweithio fel plaid unedig o dan Darren, Mims [Davies, Ysgrifennydd Gwladol Cysgodol Cymru] a fi, dw i’n hyderus y gallwn ni gael rhagor o lwyddiant yn etholiadau’r Senedd yn 2026, a dod â chwarter canrif o reolaeth Llafur i ben.

“Dw i’n dymuno pob llwyddiant i Darren wrth iddo fe gymryd yr awenau.”

‘Gostyngedig’

“Dw i’n ostyngedig yn sgil cefnogaeth anhygoel fy nghydweithwyr yn y Senedd, a’r negeseuon caredig dw i wedi’u derbyn gan aelodau’r Blaid Geidwadol ac aelodau’r cyhoedd ledled y wlad,” meddai Darren Millar.

“Bydd hi’n anodd dilyn Andrew RT Davies, ond dw i’n benderfynol o adeiladu ar ei waddol wrth i ni fynd â’r frwydr at ein gwrthwynebwyr gwleidyddol yn y cyfnod yn arwain at etholiadau’r Senedd yn 2026.

“Ar ôl 25 mlynedd o fethiant Llafur, mae Cymru’n galw allan am obaith a newid.

“Dw i’n edrych ymlaen at amlinellu ein cynlluniau i gyflwyno’r union beth hwnnw yn yr wythnosau a’r misoedd i ddod.”