Mae’r gyfres yma’n bwrw golwg ar atgofion bwyd rhai o wynebau cyfarwydd Cymru a sut mae hynny wedi dylanwadu eu harferion bwyta heddiw. Melanie Owen, cyflwynydd y gyfres Ffermio ar S4C, sy’n rhannu ei hatgofion bwyd yr wythnos hon. Yn ferch fferm o Gapel Seion ger Aberystwyth yn wreiddiol, mae hi bellach yn byw yng Nghaerdydd. Mae Melanie hefyd yn ddigrifwraig, yn sgriptio rhaglenni teledu ac yn un o gyflwynwyr y podlediad Mel Mal Jal gyda Mali Ann Rees a Jalisa Andrews…
Un o fy atgofion cyntaf ydy bwyta tost gyda chaws Dairylea a Bovril ar ei ben. Mae’n swnio’n afiach ond mae mor flasus. Dyna oedd un o cravings Mam pan oedd hi’n feichiog gyda fi ac mae’r teulu wedi parhau i’w fwyta fyth ers hynny.
![](https://golwg.360.cymru/ased/sites/2/2024/05/Melanie-Owen-Blat-Teulu-640x480.jpeg)
Pan o’n i’n blentyn doedd gen i ddim dewis ond bod yn hyderus i brofi bwyd newydd. Roedd fy rhieni wastad yn rhoi’r un bwyd i fi ag oedden nhw’n cael, felly cefais i gymysgedd o bethau. Erbyn hyn, does ‘na ddim bwyd wna’i ddim trio o leia’ unwaith!
Pan dwi wedi cael diwrnod gwael yn y gwaith, dw i’n troi at Maraconi Cheese o M&S i godi fy nghalon. Os ydych chi’n gweld fi yn neuadd fwyd M&S Croescwrlwys, chi’n gwybod bod pethau ‘di mynd o’i le’r diwrnod hwnnw.
![](https://golwg.360.cymru/ased/sites/2/2024/05/Melanie-Owen-Blat-Melanie-640x853.jpeg)
Fy mhryd bwyd delfrydol fyddai bwyd môr, ar draeth neu ar gwch falle, tra bod yr haul yn machlud.
![](https://golwg.360.cymru/ased/sites/2/2024/05/Melanie-Owen-Blat-pysgod-640x480.jpg)
Mae blas Pimms yn fy atgoffa o’r haf yn syth. Mae un gwydraid o’r ddiod yn mynd a fi nol i sawl prynhawn gyda fy ffrindiau yn yr haul. Y blas sy’n fy atgoffa o’r gaeaf ydy sinamon ac afalau. Pan dw i’n dechrau pobi gyda sinamon, dw i’n gwybod bod y Nadolig yn bendant ar ei ffordd.
![](https://golwg.360.cymru/ased/sites/2/2024/05/Melanie-Owen-Blat-Melanie-1-640x853.jpeg)
Dw i’n caru coginio i bobol eraill – dyna yw fy ‘iaith cariad’. Yn ddiweddar gwnes i brunch Jamaican i fy ffrindiau, sef Akee Saltfish. Dyna un o’r prydau dw i wrth fy modd gyda, pan mae Mam yn gwneud hi i’r teulu, felly dw i’n mwynhau cynnal y traddodiad gyda fy nheulu a ffrindiau yng Nghaerdydd.
![](https://golwg.360.cymru/ased/sites/2/2024/05/Melanie-Owen-Blat-ffrindiau-640x853.jpeg)
Mae’r llyfr Motherland gan Melissa Thompson yn llawn ryseitiau Caribïaidd dw i wrth fy gyda. Rhai traddodiadol a rhai byddech chi ddim yn disgwyl hefyd, gan gynnwys rhai ryseitiau i lysieuwyr.