Heddiw (dydd Mawrth, Ebrill 16) yw’r diwrnod olaf i gofrestru i bleidleisio ar gyfer etholiadau Comisiynwyr yr Heddlu a Throseddu yng Nghymru.
Amcangyfrifir bod tua 2.5 miliwn o bobol yn gymwys i bleidleisio yn yr etholiad, ond mae cymaint â 400,000 o bobol yng Nghymru naill ai wedi’u cofrestru’n anghywir neu heb eu cynnwys ar y gofrestr o gwbl.
Mae’r Comisiwn Etholiadol yn atgoffa pleidleiswyr bod rhaid iddyn nhw gofrestru er mwyn sicrhau bod eu lleisiau yn cael eu clywed ar 2 Mai.
Y dyddiad cau ar gyfer cofrestru yw hanner nos heno.
Bydd angen i bleidleiswyr hefyd ddangos ID ffotograffig yn yr orsaf bleidleisio.
Mae rhestr o’r mathau o ID y byddan nhw’n ei dderbyn gael ar eu gwefan ac mae ID pleidleisiwr a chael am ddim i’r rhai nad oes ganddynt fath o ID ffotograffig sy’n cael ei dderbyn.
‘Dim ond pum munud y mae’n ei gymryd’
“Dim ond pobol sydd wedi cofrestru i bleidleisio all ddweud eu dweud yn etholiadau Comisiynwyr yr Heddlu a Throsedd ar faterion sy’n bwysig i’w hardal heddlu,” meddai Rhydian Thomas, Pennaeth Comisiwn Etholiadol Cymru.
“Dim ond pum munud y mae’n ei gymryd.
“Mae hefyd yn hanfodol bod pleidleiswyr yn cofio dod ag ID ffotograffig i orsafoedd pleidleisio.
“Gall unrhyw un nad oes ganddo fath o ID a dderbynnir gwneud cais am ID pleidleisiwr am ddim hyd nes 24 Ebrill.”
I fod yn gymwys i bleidleisio yn yr etholiadau mae’n rhaid i chi fod yn ddinesydd Prydeinig neu Wyddelig, neu’n ddinesydd cymwys o’r Gymanwlad sy’n byw yng Nghymru, ac mae’n rhaid i chi fod yn 18 oed neu’n hŷn.
Bydd angen i unrhyw un sydd wedi bod ar y gofrestr yn flaenorol ac sydd wedi symud cartref yn ddiweddar neu y mae eu manylion wedi newid gofrestru i bleidleisio eto.
