Mae Heddlu’r De wedi dod o hyd i ffatri ganabis ar y stryd yn Abertawe lle cafodd landlord ei lofruddio gan ei denant yn 2015.
Cafodd yr heddlu eu galw i Heol Vivian yn ardal Sgeti fore ddoe (dydd Mercher, Mawrth 27), yn dilyn adroddiadau am fwrgleriaeth honedig yn oriau man y bore.
Pan atebodd yr heddlu yr alwad, daethon nhw o hyd i oddeutu 150 o blanhigion yn yr eiddo, ac fe fu tîm fforensig yn gweithio ar y safle.
Dywed yr heddlu fod dyn gafodd ei arestio yn y fan a’r lle bellach wedi cael ei ryddhau ar fechnïaeth.
“Does dim cysylltiad ag unrhyw ddigwyddiadau yn y gorffennol,” meddai llefarydd wrth golwg360.
Ar Heol Vivian yn Sgeti y cafodd Alec Warburton ei lofruddio gan David Ellis, oedd wedi ffoi i Iwerddon cyn cael ei arestio’n ddiweddarach, a’i garcharu am 26 mlynedd.
Tîm fforensig yn gweithio ar stryd landlord gafodd ei lofruddio yn 2015
