‘Rhaid i’r Blaid Lafur wrando ar ffermwyr cyn ei bod yn rhy hwyr’

Mae’n rhaid i’r Blaid Lafur wrando ar ffermwyr Cymru cyn ei bod yn rhy hwyr, yn ôl Aelod Ceidwadol o’r Senedd.

Mae Sam Kurtz, llefarydd materion gwledig y blaid, wedi bod yn ymateb i sylwadau arweinwyr y diwydiant amaeth sydd wedi rhybuddio bod protestiadau, fel y rhai sydd wedi bod yn Ffrainc dros yr wythnosau diwethaf, “fwy neu lai yn anochel”.

Mae ffermwyr ar draws Ewrop wedi bod yn gweithredu, yn bennaf oherwydd diwygiadau amgylcheddol a chostau cynyddol.

Ac mae undebau amaeth yng Nghymru wedi rhybuddio bod llawer o anniddigrwydd ymhlith ffermwyr yn sgil diwygiadau Llywodraeth Cymru.

Mae newidiadau i’r cymorth mae ffermwyr yn ei gael a’r rheolau mae’n rhaid iddyn nhw eu dilyn yn digwydd ar draws y Deyrnas Unedig.

Mae Llywodraeth Cymru yn annog ffermwyr i gymryd rhan mewn ymgynghoriad am y cynlluniau.

Ond mae Ian Rickman, Llywydd Undeb Amaethwyr Cymru, wedi dweud wrth BBC Cymru ei bod hi “fwy neu lai yn anochel y bydd rhyw fath o brotest gan ffermwyr”.

‘Rhwystredigaeth a dicter’

“Rhaid i’r Llywodraeth Lafur wrando ar y diwydiant amaeth cyn ei bod hi’n rhy hwyr,” meddai Sam Kurtz.

“Mae ffermwyr Cymru wedi gorfod delio â llu o newidiadau polisi mewn cyfnod byr o amser, nid yw eu rhwystredigaeth yn cael ei glywed gan y Llywodraeth Lafur ac maen nhw’n teimlo mai protestiadau yw’r unig opsiwn.

“Mae yna wir ymdeimlad o rwystredigaeth a dicter yn y sector ar hyn o bryd, felly rwy’n annog Llywodraeth Cymru i oedi’r ymgynghoriad hwn ac i ailddyblu eu hymdrechion i gael y cynllun yn iawn fel ei fod yn gweithio i ffermwyr Cymru.”