Mwyafrif o Aelodau Llafur o’r Senedd yn cefnogi Jeremy Miles i fod yn arweinydd

Mae gan Jeremy Miles gefnogaeth sylweddol gan Aelodau’r Senedd o fewn ei blaid ei hun er mwyn sefyll i fod yn arweinydd nesaf Llafur Cymru.

Mae nifer wedi datgan eu cefnogaeth i Jeremy Miles ers neithiwr (nos Sul, Rhagfyr 17), sef:

Mick Antoniw
Julie Morgan
Lee Waters
Jenny Rathbone
Carolyn Thomas
Rhianon Passmore
John Griffiths
Mike Hedges

Maen nhw wedi ychwanegu eu henwau at restr sydd eisoes yn cynnwys Hannah Blythyn, Sarah Murphy ac Alun Davies.

‘Arweinydd a Phrif Weinidog gwych’

“Rydyn ni wedi cymryd yr amser i siarad â’n gilydd ac i ystyried go iawn pwy sydd orau i Gymru, yn y lle cyntaf,” meddai Julie James.

“Mae Aelodau’r Senedd yn gwybod y cyfrifoldeb enfawr sydd gennym ni â’n henwebiadau.

“Barn y mwyafrif o Aelodau Llafur o’r Senedd yw y byddai Jeremy Miles yn arweinydd gwych i’r blaid ac yn Brif Weinidog gwych i Gymru.

“Mae angen rhywun arnom fydd yn estyn allan, yn dod â phobol ynghyd, ac yn gwneud y gwaith anodd fydd ei angen er mwyn sefyll i fyny dros Gymru – yn enwedig gydag etholiad cyffredinol yn dod.

“Mae gan Jeremy yr holl rinweddau sydd eu hangen, a mwy, a dyna pam nad yw’n syndod i mi fod mwyafrif clir o’r grŵp yn y Senedd, gweinidogion sy’n cydweithio â fe yn y llywodraeth, a chriw cyfan 2021 o Aelodau newydd o’r Senedd yn cefnogi Jeremy Miles ar gyfer dyfodol Cymru.”

Hefyd yn ei gefnogi mae pump o ymgeiswyr seneddol sy’n disgwyl ennill seddi yn San Steffan, sef: