Mae Uno’r Undeb yn galw am ymyrraeth ar unwaith gan Lywodraeth San Steffan i geisio achub diwydiant dur y Deyrnas Unedig.

Daw hyn yn sgil y newyddion fod ymgynghoriad ar y gweill i’r posibilrwydd o hyd at 3,000 o ddiswyddiadau yn y diwydiant dur, y rhan fwyaf ohonyn nhw ar safle Tata Steel ym Mhort Talbot.

Ac mae’n dod er gwaethaf addewid o fuddsoddiad gwerth £500m i helpu Tata i symud oddi wrth ffwrneisi chwyth traddodiadol tuag at ffwrnais arc trydan.

Mae’r undeb yn gwrthwynebu diswyddiadau torfol, meddai’r Ysgrifennydd Cyffredinol Sharon Graham, sy’n dweud bod strategaeth llywodraethau olynol wedi methu a bod angen gwneud mwy i helpu’r gymuned ddur.

“Mae Uno’r Undeb yn condemnio ystyriaeth Tata o ddiswyddiadau torfol,” meddai.

“Nid ydym yn derbyn yr angen am yr un toriad swydd.

“Mae strategaeth y llywodraethau olynol wedi methu.

“Ni ddylai trethdalwyr fod yn talu’r bil am fuddsoddiad newydd, oni bai bod hynny’n gysylltiedig â gwarantau swydd rwymol.

“Unig bwrpas Tata yw gwasanaethu ei gyfranddalwyr, nid cymunedau dur y Deyrnas Unedig.

“Dim ond trwy i’r llywodraeth gymryd rhan yn y cwmni, y bydd y dewisiadau cywir yn cael eu gwneud ar gyfer economi’r Deyrnas Unedig.

“Mae diwydiant dur y Deyrnas Unedig ar groesffordd, ac mae dewis gwleidyddol clir.

“Mae angen i wleidyddion benderfynu nawr ar ochr pwy maen nhw.

“Byddai cynllun Uno’r Undeb ar gyfer dur yn gweld y Deyrnas Unedig unwaith eto yn arwain y byd ym maes dur, gan ddyblu cynhyrchiant, diogelu cyflogaeth a chreu miloedd o swyddi newydd.

“Mae angen i’r llywodraeth a’r blaid Lafur nawr fynd yn llawer pellach a chefnogi Cynllun y Gweithwyr ar gyfer Dur.

“Mae Unite yn ymrwymo adnoddau sylweddol yn ein brwydr i achub ein diwydiant dur.”

Cynllun gweithwyr

Mae Uno’r Undeb wedi sefydlu Cynllun Gweithwyr ar gyfer Dur, sy’n nodi pedwar amcan allweddol ar gyfer dyfodol diwydiant dur y Deyrnas Unedig:

  • newid rheolau caffael i adael i gontractau cyhoeddus y Deyrnas Unedig ddefnyddio 100% o ddur y Deyrnas Unedig, gan greu miloedd o swyddi
  • buddsoddiad cyhoeddus ar gyfer Cynllun Pontio Gweithwyr Dur heb golli swyddi. Trosglwyddiad cyfiawn – wrth ddyblu’r gallu i ailadeiladu’r diwydiant a thyfu swyddi. Y buddsoddiad sydd ei angen yw £1bn y flwyddyn dros ddeuddeg mlynedd a bydd yn talu amdano’i hun gyda mwy o refeniw.
  • mynd i’r afael â phrisiau ynni. Dod â chapiau prisiau trydan i mewn a pherchnogaeth gyhoeddus ar y grid i wneud ein dur hyd yn oed yn fwy cystadleuol.
  • Dim mwy o arian am ddim. Rhaid i fuddsoddiad cyhoeddus ar gyfer dur ddod â gwarantau swyddi cadarn.