Ddechrau’r mis, cafodd Seremoni Wobrwyo Cymru’n Blodeuo 2023 ei chynnal yn Neuadd y Dref yn Ninbych, a heidiodd unigolion a chymunedau o bob cwr o Gymru i fwynhau dathliadau Dinbych yn Blodeuo.
Eleni, enillodd Dinbych ddyfarniad aur, ynghyd â gwobr tref orau Cymru – a hynny am y bedwaredd flwyddyn yn olynol.
Cafodd ei ddisgrifio gan y Cynghorydd Delyth Jones fel “llwyddiant ysgubol sy’n cydnabod oriau maith o gynllunio, plannu, gofal, peintio, twtio a glanhau dros wythnosau a misoedd yn flynyddol”.
Mae seremoni Cymru’n Blodeuo yn cael ei chynnal yn flynyddol o dan adain y Gymdeithas Arddwriaethol Frenhinol, gyda’r nod o annog balchder ac ysbryd cymunedol.
Ac yn groes i’r disgwyl, mae’r gystadleuaeth yn ymwneud â mwy na dim ond blodau, ac mae’r disgwyliad bod cydweithio’n digwydd yn elfen bwysig o’r gwaith.
Mae’r beirniaid yn ystyried ffactorau megis sbwriel, posteri anghyfreithlon, coedwigaeth a graffiti wrth feirniadu’r gwaith.
Balchder
Dywed cadeirydd y grŵp ei bod hi’n falch o’r cyfle i arddangos y dref.
“Croesawodd Dinbych yn Blodeuo’r cyfle i wahodd pobl a grwpiau o’r un meddylfryd o bob rhan o Gymru, i ddathlu blwyddyn arall o Gymru yn Blodeuo yma yn Ninbych hardd,” meddai Lyndsey Tasker.
“Rydym wedi cyffroi o rannu rhywfaint o’r hyn sydd gan ein tref ganoloesol hanesyddol i’w gynnig, ac yn falch o arddangos Dinbych.”
