Mae plismon wedi cael ei anafu’n ddifrifol yn dilyn gwrthdrawiad rhwng pedwar cerbyd ar yr A55 ger Llanfairfechan neithiwr.
Cafodd Heddlu’r Gogledd eu galw i’r gwrthdrawiad, a oedd yn cynnwys car yr heddlu, tua 8yh nos Lun, rhwng cyffordd 14 a 15 ar y ffordd ddwyreiniol.
Cafodd y plismon ei gludo i Ysbyty Gwynedd ym Mangor gydag anafiadau difrifol. Mae’n parhau i fod yn yr ysbyty ar hyn o bryd.
Yn dilyn y gwrthdrawiad cafodd dyn 21 oed ei arestio am fethu prawf cyffuriau ar ochr y ffordd.
Mae bellach wedi cael ei ryddhau ar fechnïaeth tra bydd y prawf yn cael ei ddadansoddi ymhellach.
Roedd y ffordd ynghau am gyfnod a chafodd y traffig ei ddargyfeirio.
Mae’r heddlu’n apelio ar unrhyw un a welodd y gwrthdrawiad i’w ffonio yn Uned Plismona’r Ffyrdd ar 101 a dyfynnu’r cyfeirnod U012221.
