Strategaeth addysg Cyngor Ynys Môn: “Hen bolisi mewn dillad newydd”

Wrth drafod strategaeth addysg Cyngor Ynys Môn, mae Cymdeithas yr Iaith yn dweud eu bod nhw’n “gwisgo hen bolisi mewn dillad newydd”.

Maen nhw’n cyhuddo’r Cyngor o weithredu’r hen bolisi o gau ysgolion gwledig, wrth i’r Cyngor gynnal ymgynghoriad cyhoeddus ar y Strategaeth ddraft ‘Moderneiddio Cymunedau Dysgu a Datblygu’r Gymraeg’, fydd yn dod i ben ddydd Mercher (Mai 17).

Ymhlyg yn y strategaeth mae’r bygythiad i gau hyd at 17 o ysgolion cynradd sydd â llai na 91 o ddisgyblion.

‘Diddychymyg a digalon’

Yn ôl Ffred Ffransis o Gymdeithas yr Iaith, mae’n “ddogfen ddiddychymyg a digalon” sydd â’r prif nod o “wthio unwaith eto eu hobsesiwn i gau ysgolion gwledig Cymraeg”.

“Yma maen nhw’n gwisgo hen bolisi a rhagfarn mewn dillad newydd gan honni mai ceisio lleihau ôl-troed carbon yw’r nod oherwydd adeiladau diffygiol y mae’r Cyngor ei hun yn euog o beidio a buddsoddi ynddynt, a thrwy honni eu bod yn ymateb i agenda gwrth-dlodi Llywodraeth Cymru sydd ei hun wedi rhoi llawer o’r ysgolion ar Restr Ysgolion Gwledig er mwyn eu gwarchod, trwy fod rhagdyb o blaid eu cadw ar agor,” meddai.

“Yn anhygoel, honna’r Cyngor eu bod yn gweithredu i ddatblygu’r Gymraeg trwy danseilio cymunedau gwledig Cymraeg wrth gau’r ysgolion.

“Mae’r Cyngor yn tristau fod demograffeg y cymunedau’n newid trwy fod llai o bobol ifainc ond eto am gau ysgolion, sy’n ei gwneud yn llai tebyg byth y bydd teuluoedd ifainc yn ymgartrefu yn y cymunedau hyn heb ysgol i’w plant.

“Byddwn fel Cymdeithas yn anfon ein ymateb llawn i’r strategaeth ddrafft at ysgolion a Chynghorau Cymuned yn ardaloedd gwledig yr ynys, a byddwn yn cefnogi pob cymuned sydd am frwydro dros eu dyfodol.”