Yn ei neges Blwyddyn Newydd, mae Prif Weinidog Cymru yn canmol parodrwydd pobol i helpu’i gilydd yn ystod “blwyddyn anodd”.
Gyda phobol yn agor eu cartrefi i filoedd o Wcráin a chymunedau’n rhoi cymorth i’w gilydd yn sgil yr argyfwng costau byw, “rydym wedi gweld cryfder a gwir garedigrwydd”, meddai Mark Drakeford.
Gofynna hefyd i bobol obeithio am heddwch yn 2023, ac am flwyddyn hapusach.
“Blwyddyn Newydd Dda i chi i gyd,” meddai Mark Drakeford yn ei neges.
“Gobeithio i chi gael Nadolig llawen a heddychlon.
“Wrth i 2022 ddod i ben, bydd llawer yn falch o weld diwedd blwyddyn anodd.
“Hon oedd blwyddyn lansio rhyfel creulon Rwsia yn erbyn Wcráin.
“Lladdwyd miloedd, ac mae miliynau wedi gorfod ffoi o’u cartrefi.
“A dros y deuddeg mis diwethaf mae’r argyfwng costau byw wedi gwaethygu.
“Mae’n fwy anodd cael dau ben llinyn ynghyd.
“Ond, hyd yn oed yn y cyfnod anodd hwn, mae pobol wedi bod mor barod i helpu eraill.
“Rydym wedi gweld cryfder a gwir garedigrwydd.
“Mae pobol wedi agor eu cartrefi i filoedd o bobl o Wcráin, gan gynnig noddfa a diogelwch yma yng Nghymru.
“Ac unwaith eto, mae cymunedau wedi ymuno i helpu ei gilydd yn yr argyfwng costau byw – yn union fel yn y pandemig.
“Mae Blwyddyn Newydd yn ddechrau newydd ac rwy’n siŵr bod gan bawb eu gobeithion a’u dymuniadau am y flwyddyn nesaf.
“Dewch inni obeithio am heddwch yn 2023, ac amser hapusach i ddod.
“Blwyddyn Newydd Dda i chi i gyd.”
