Wrth i dywydd gaeafol ddechrau gafael mae nifer o bobol yn poeni am sut fyddan nhw’n fforddio cynhesu eu tai yn sgil cynnydd aruthrol mewn costau ynni.
Fodd bynnag, mae cymorth ariannol ar gael gan Lywodraeth y Deyrnas Unedig i rai o bobol fwyaf bregus ein cymdeithas.
Ond beth yn union sydd ar gael a phwy sy’n gymwys i dderbyn yr arian?
Beth yw’r Taliad Tywydd Oer?
Bwriad y cynllun yw cefnogi pobol Cymru a Lloegr yn ystod cyfnodau pan fo’r tywydd yn eithriadol o oer.
Mae cymhwysedd yn dibynnu ar ba mor oer yw hi yn eich ardal ac a ydych eisoes yn derbyn cymorth drwy fudd-daliadau.
Pwy all dderbyn y Taliad Tywydd Oer?
Fyddwch chi ddim ond yn gymwys ar gyfer y taliad tywydd oer os ydych chi eisoes yn derbyn:
- Credyd Pensiwn
- Cymorth Incwm
- Lwfans Ceisio Gwaith yn seiliedig ar incwm
- Lwfans Cyflogaeth a Chymorth sy’n gysylltiedig ag Incwm
- Credyd Cynhwysol
Fe ddylai’r rhai sy’n gymwys gael eu talu’n awtomatig. Nid oes angen gwneud cais.
Faint allwch chi ei gael?
Fe gewch chi £25 am bob cyfnod saith diwrnod o dywydd oer iawn.
Hynny yw, os yw’r tymheredd sy’n cael ei gofnodi neu ei ragolygu yn ei hardal chi yn sero gradd selsiws neu is rhwng Tachwedd 1 a Mawrth 31.
Ar ôl pob cyfnod o dywydd oer iawn yn eich ardal chi, dylech chi gael taliad o fewn 14 diwrnod gwaith.
Caiff y swm ei roi i’r un cyfrif banc neu gymdeithas adeiladu â’ch taliadau budd-dal.
Os nad ydych chi’n derbyn taliad ond yn credu y dylech fod wedi ei dderbyn, gallwch gysylltu â’r Gwasanaeth Pensiwn neu’r Ganolfan Byd Gwaith am gymorth.
