Mae Ysgrifennydd Materion Gwledig Cymru wedi cyhoeddi bod diwydiant bwyd a diod Cymru’n parhau i fynd o nerth i nerth, wrth i’r ffigyrau diweddaraf ddangos bod trosiant cadwyni cyflenwi’r sector wedi cynyddu i £23bn yn 2021 – sy’n gynnydd o 2.9% o’r trosiant o £22.4bn yn 2020.
Roedd twf cadarn iawn yn y sector gweithgynhyrchu bwyd a diod yng Nghymru, sy’n cynhyrchu cynhyrchion amrywiol, yn 2021 gyda throsiant yn cynyddu 10.2% o £4.9bn i £5.4bn.
Mae’r cyhoeddiad gan Lesley Griffiths heddiw (dydd Llun, Hydref 17) yn dilyn y newyddion yn gynharach eleni fod gwerth allforion bwyd a diod o Gymru wedi cyrraedd ei lefel uchaf erioed yn 2021, sef £640m.
Mae Llywodraeth Cymru’n parhau i helpu busnesau yn y sector drwy amryfal gynlluniau cymorth sy’n darparu mewnwelediad a gwybodaeth am y farchnad, buddsoddi, cefnogaeth dechnegol, cefnogaeth allforio a phwyslais cryf ar rwydweithio busnes.
‘Ymrwymiad ac awydd’
“Mae’r ffigyrau yma’n dangos ymrwymiad ac awydd busnesau bwyd a diod o Gymru i lwyddo, er gwaethaf y sefyllfa economaidd anodd maen nhw’n ei hwynebu,” meddai Lesley Griffiths.
“Rwy’n falch iawn o’r gwytnwch a’r mentergarwch y mae busnesau yn eu dangos wrth adfer ar ôl y pandemig a goresgyn heriau lluosog yn y gadwyn gyflenwi.
“Mae busnesau arloesol Cymru yn arwain o fewn y sector, ac mae’r ffaith eu bod yn ennill gwobrau’n gyson yn tystio i hyn.
“Mae cefnogaeth Llywodraeth Cymru hefyd yn hollbwysig a bydd hyn yn parhau wrth i ni helpu busnes i gyflawni hyd eithaf eu gallu.”
