Ymestyn y dyddiad cau ar gyfer cofrestru i gystadlu yn yr Urdd yn sgil problemau technegol

Bydd hi bellach yn bosib cofrestru ar gyfer cystadlaethau Eisteddfod yr Urdd tan hanner nos ar Chwefror 17, yn sgil problemau technegol.

Ddoe (dydd Llun, Chwefror 14) oedd y dyddiad cau yn wreiddiol, ond mae’r Urdd wedi dweud eu bod nhw’n ymwybodol fod rhai wedi cael problemau gyda’r system.

Nifer uchel o ddefnyddwyr yn ceisio defnyddio’r safle ar unwaith oedd achos y broblem, meddai’r Urdd, ac maen nhw wedi ymddiheuro’n arw am yr anghyfleustra.

Gall unrhyw un sy’n cael problem gysylltu â’r Urdd dros e-bost er mwyn sicrhau bod pawb sydd eisiau cystadlu yn gallu cofrestru i wneud hynny, meddai’r mudiad.

“Mae’r Urdd bellach yng nghanol cyfnod o wirio ceisiadau i gystadlu yn Eisteddfod yr Urdd, ac o ganlyniad, mae’r system gofrestru am aros ar agor tan hanner nos ar yr 17eg o Chwefror,” meddai Urdd Gobaith Cymru.

“Mae staff yr Urdd wrthi’n delio gydag ymholiadau ac yn awyddus i helpu.

“Os ydy defnyddwyr a darpar gystadleuwyr yn cysylltu â’r Urdd drwy e-bost – eisteddfod@urdd.org – gydag unrhyw broblem, fe fydd aelod o staff yn medru cynnig datrysiad er mwyn sicrhau fod pawb sydd wedi cysylltu yn gallu cofrestru i gystadlu.”