Mae Cyngor Sir Conwy yn gobeithio cynyddu canran y plant sy’n cael addysg Gymraeg o 25% i 39% dros y deng mlynedd nesaf.

Mae’n ofynnol i awdurdodau lleol yng Nghymru lunio cynllun ac adroddiad blynyddol i ddangos sut mae’r Gymraeg yn cael ei hyrwyddo drwy ysgolion.

Ddydd Mawrth (Hydref 26), fe wnaeth Cabinet Cyngor Sir Conwy gefnogi’r cynllun drafft strategol ar y Gymraeg mewn addysg, a fydd nawr yn mynd allan i ymgynghoriad cyhoeddus.

Bydd y cynllun yn pennu sut mae’r Gymraeg yn cael ei siarad o ddosbarthiadau meithrin a derbyn yr holl ffordd drwodd i ysgolion cynradd ac i ysgolion uwchradd.

Mae yno hefyd obaith i gynyddu’r ddarpariaeth i blant ag anghenion dysgu ychwanegol a chynyddu nifer yr athrawon Cymraeg eu hiaith.

Bydd ‘cyfleoedd trochi’ Cymraeg yn cael eu cynnig i blant ysgol gynradd, a bydd y Cyngor yn buddsoddi mewn hyfforddiant i hyrwyddo datblygu gyrfa a gweithlu Cymraeg ei iaith mewn gofal plant.

Mae Llywodraeth Cymru yn gobeithio cael miliwn o siaradwyr Cymraeg erbyn 2050.

Bydd y cyngor hefyd yn ymdrechu i godi ymwybyddiaeth o fanteision siarad Cymraeg a hyrwyddo’r diwylliant Cymraeg.

‘Lledaenu negeseuon am addysg ddwyieithog’

Y Cynghorydd Julie Fallon yw’r aelod cabinet dros addysg, a hi oedd wedi cyflwyno’r adroddiad.

“Rwy’n gobeithio y byddwn yn llwyddiannus,” meddai.

“A’r gobaith yw unwaith i ni ledaenu negeseuon am addysg ddwyieithog a pha mor dda yw hynny i bobol ifanc ei gael am weddill eu hoes, i gael cyfleoedd, y bydd pobol yn dewis addysg Gymraeg.”

Cefndir

Ar hyn o bryd, mae 20 o ysgolion cynradd Conwy yn dysgu yn Gymraeg.

Mae 14 o ysgolion cynradd yn addysgu yn Saesneg yn bennaf gyda defnydd sylweddol o’r Gymraeg (20-50%), ac mae 17 ysgol yn addysgu llai nag 20% yn y Gymraeg.

Ysgol y Creuddyn yw’r unig ysgol uwchradd Gymraeg yng Nghonwy, ac mae Ysgol Dyffryn Conwy yn Llanrwst yn ddwyieithog.

Mae Aberconwy, Bryn Elian, Eirias, Emrys ap Iwan a John Bright i gyd yn ysgolion cyfrwng Saesneg.

‘Sgil bwysig’

“Rydym i gyd yn gwybod, wrth symud ymlaen, ei fod (Cymraeg) yn sgil arbennig iawn ac yn sgil bwysig iawn,” meddai Charlie McCoubrey, arweinydd Cyngor Conwy.

“Erbyn 2050/2060, bydd mwy o bobol sydd â sgiliau Cymraeg.

“Bydd yn gwella eu gyrfaoedd ac yn gwella eu bywyd diwylliannol a’u hymdeimlad o berthyn.

“Mae’n lle hyfryd i fod yn byw.”

Cafodd yr adroddiad ei gefnogi yn unfrydol.