Mae’n debyg fod ffiniau etholiadol newydd Cymru wedi eu cyhoeddi diwrnod yn gynnar gan y wefan wleidyddol adain-dde Guido.
Mae’r map etholiadol newydd yn dangos y bydd etholaethau Bangor a Chaernarfon yn cael eu rhannu’n ddwy, yn ogystal ag etholaeth Ceredigion yn cael ei chyfuno â Gogledd Sir Benfro.
Mae etholaeth Castell Nedd hefyd am ddod yn rhan o etholaeth Brycheiniog a Maesyfed.
Initial proposals for the new Welsh constituencies has been leaked a day early by Guido, here's the first look at the new 32 seat Welsh electoral map (down from 40): pic.twitter.com/qTChXa1cpY
— Election Maps UK (@ElectionMapsUK) September 7, 2021
“Dyma’r cynigion cyntaf ar gyfer etholaethau newydd Cymru sydd wedi cael eu rhyddhau ddiwrnod yn gynnar gan Guido, dyma’r olwg gyntaf ar fap etholiadol newydd Cymru 32 sedd (i lawr o 40),” meddai’r wefan Election Maps UK.
Cymru yn gweld y cwtogi mwyaf
Fe fu cryn ddisgwyl ers tro am y cyhoeddiad fod nifer y seddi yng Nghymru yn cael ei thorri o 40 i 32.
Cafodd Lloegr wybod am y newid i’w ffiniau etholaethol ym Mehefin. Yno, bydd y nifer yn gostwng o 553 i 543, tra bydd nifer aelodau’r Alban yn gostwng o 59 i 57.
Fydd dim newid yn ffiniau etholiadol Gogledd Iwerddon.
Yn ôl Deddf 1986, mae’n rhaid i bob etholaeth a gafodd ei llunio gan y Comisiwn Ffiniau i Gymru gynnwys rhwng 69,724 a 77,062 o etholwyr.
Mae gan Ynys Môn statws gwarcheidiol oherwydd maint y boblogaeth, sy’n golygu nad yw’r etholaeth yn cael ei chynnwys yn yr adolygiad.
Mae gan bedair etholaeth ledled y Deyrnas Unedig statws gwarcheidiol oherwydd eu daearyddiaeth unigryw – Orkney a Shetland, sedd Ynysoedd Gorllewinol yr Alban na h-Eileanan an Iar, a dwy sedd Ynys Wyth.
Bydd y newid hwn yn cael effaith ar wleidyddiaeth yng Nghymru a byddan nhw’n cael eu gweithredu yn yr Etholiad Cyffredinol nesaf fis Mai 2024.
Bydd y Comisiwn Ffiniau i Gymru yn dechrau cyfnod ymgynghori o wyth wythnos, lle gall y cyhoedd rannu eu barn am yr etholaethau o y fory (dydd Mercher, Medi 8).
Bydd y broses ymgynghori yn dod i ben ar Dachwedd 3.
