Daeth cadarnhad fod Cyngor Gwynedd wedi cadw safon aur y Fframwaith Ansawdd Iechyd Genedlaethol.
Dyma strwythur genedlaethol Llywodraeth Cymru er mwyn hyrwyddo a gwella iechyd a lles yn y gweithle.
Mae’r fframwaith yn cydnabod arferion da o ran iechyd a lles staff.
Cafodd y Safon Aur ei rhoi i Gyngor Gwynedd am y tro cyntaf yn 2011 ac mae’r sefydliad wedi cyrraedd y safon yn gyson ers hynny.
Yn yr adolygiad eleni, roedd cydnabyddiaeth arbennig gan yr aseswyr i’r ffordd mae’r Cyngor wedi addasu a chadw’r ddarpariaeth iechyd a lles i staff i fynd drwy gydol y pandemig gan sicrhau bod cymorth yn dal i fod ar gael er fod yr amgylchiadau gwaith yn wahanol.
“Dw i’n cydnabod a gwerthfawrogi fod sefydliad fel awdurdod lleol wedi bod o dan gryn straen dros y deuddeg mis diwethaf a fod hyn wedi cael oblygiadau ar lles eich gweithwyr,” meddai’r asesydd Bryn Jones.
“Hyd yn oed yn y cyfnod anodd yma … [mae] Cyngor Gwynedd wedi parhau i gynnal ei darpariaeth lles a iechyd, yn ogystal â datblygu a chyflwyno mentrau newydd.
“Hoffwn eich llongyfarch ar gwblhau eich Gwirio Statws Lefel Aur yn llwyddiannus a rwy’n ffyddiog drwy barhau i adolygu ac adnewyddu eich pecyn iechyd a lles y byddwch yn barod ddelio a sialensiau’r dyfodol.”
“Lle da i weithio”
Ychwanegodd y Cynghorydd Nia Jeffreys, Aelod Cabinet Cyngor Gwynedd dros Adran Cefnogaeth Gorfforaethol, mai “ein staff yw ein hadnodd bwysicaf felly yn naturiol mae iechyd a lles pawb sy’n gweithio yma yn bwysig i ni fel Cyngor”.
“Er gwaetha’r amser anodd rydym i gyd wedi ei wynebu dros y flwyddyn a hanner ddiwethaf, mae staff y Cyngor wedi cario mlaen ac wedi mynd y filltir ychwanegol,” meddai.
“Heb waith caled ac ymdrechion ein swyddogion, byddai pobol a chymunedau Gwynedd ar eu colled yn fawr.
“Dwi’n teimlo’n gryf fod angen gwasanaethau mewn lle i ddiogelu iechyd a lles ein staff, felly dwi’n falch o air yr aseswyr fod Cyngor Gwynedd ymysg y goreuon yn y sector gyhoeddus yng Nghymru.
“Dyma gadarnhad pellach fod Cyngor Gwynedd yn le da i weithio.”
