Mae dyn o Wrecsam a gafwyd yn euog o lofruddio cydnabod busnes wedi’i garcharu am 18 mlynedd.
Cafwyd Barry John Bagnall, 42, yn euog o lofruddio Terrence Edwards ac o weithredu gyda’r bwriad o wyrdroi cwrs cyfiawnder.
Cafwyd hyd i gorff Terrence Edwards yn ei gartref ym Mharc Caia ar Fehefin 1 y llynedd.
Yn ôl y Ditectif Arolygydd Chris Bell o Heddlu’r Gogledd, cafodd ei ladd “mewn gwaed oer” ar ôl cael ei daro ddwywaith yn ei ben.
“Bu hwn yn ymchwiliad hir ac arbennig o heriol,” meddai.
“Hoffwn ddiolch i’r cyhoedd a’r tystion wnaeth roi tystiolaeth yn y llys.
“Gobeithio y bydd y ddedfryd heddiw yn cynnig cysur a rhyw fath o ddiweddglo i deulu a ffrindiau agos Terry.”
