Beiciwr modur mewn cyflwr difrifol yn dilyn gwrthdrawiad ger Nant Gwynant

Mae beiciwr modur mewn cyflwr difrifol yn dilyn gwrthdrawiad ger Nant Gwynant, Beddgelert brynhawn ddoe (dydd Mercher, Gorffennaf 7).

Cafodd Heddlu Gogledd Cymru eu galw yno ychydig cyn 1:20yp ddoe, yn dilyn adroddiadau o wrthdrawiad yn cynnwys beic modur ar yr A498 rhwng Pen y Gwryd a Beddgelert.

Cafodd y beiciwr modur, sydd yn ei 30au, ei gludo i Ysbyty Gwynedd cyn cael ei gludo mewn Ambiwlans Awyr i’r ysbyty yn Stoke.

Mae ei anafiadau’n cael eu disgrifio fel rhai a allai beryglu ei fywyd, ac mae Uned Plismona’r Ffyrdd Heddlu Gogledd Cymru’n apelio am dystion ar hyn o bryd.

“Roedd y beiciwr yn teithio i gyfeiriad Beddgelert, a dw i’n annog unrhyw un a allai fod yn teithio ar hyd yr A498 tua 1yp, neu unrhyw un a allai fod â lluniau dashcam, i gysylltu â ni,” meddai’r Cwnstabl Daniel Edwards.

“Rydyn ni’n gwybod hefyd fod ambell berson wedi stopio yn safle’r digwyddiad, ond eu bod nhw wedi gadael cyn i ni adael, felly dw i’n eu hannog nhw i gysylltu os gwelwch yn dda.”