Mae trefnwyr Gwobr Llyfr y Flwyddyn wedi cyhoeddi pwy fydd beirniaid y gystadleuaeth sy’n dathlu doniau llenyddol awduron Cymru yn y Gymraeg a’r Saesneg.
Mae deuddeg gwobr, gyda chyfanswm o £14,000 ar gael i’r awduron llwyddiannus yn yr adrannau Barddoniaeth, Ffuglen, Ffeithiol Greadigol a Phlant a Phobl Ifanc.
Beirniaid y gwobrau Cymraeg eleni yw’r bardd a’r awdur Guto Dafydd; yr awdur, cyflwynydd a chyn Bardd Plant Cymru, Anni Llŷn; yr awdur, academydd a’r darlithydd Tomos Owen; a’r comedïwr a’r awdur, Esyllt Sears.
Fel rhan o ddathliadau Dydd Gŵyl Dewi eleni, mae Llenyddiaeth Cymru yn falch o gyhoeddi beirniad Gwobr Llyfr y Flwyddyn 2021, ynghyd â phartneriaeth ddarlledu gyda @BBCWales: https://t.co/gfuy7DDtE7#LLYF21 #PethauBychain #GwylDewi pic.twitter.com/xfIIR5tI80
— Llenyddiaeth Cymru (@LlenCymru) March 1, 2021
Beirniaid y gwobrau Saesneg eleni yw’r bardd, awdur a dawnsiwr Tishani Doshi; yr athro cynradd, adolygwr a’r dylanwadwr Scott Evans; y Paralympiwr, yr aelod o Dŷ’r Arglwyddi, siaradwr cymhelliant a’r darlledwr Tanni Grey-Thompson; a’r academydd, awdur ac actifydd, a chyn enillydd Gwobr Llyfr y Flwyddyn, Charlotte Williams.
Yn beirniadu’r llyfrau Saesneg y flwyddyn hon y mae Tishani Doshi, Scott Evans, Tanni Grey-Thompson a Charlotte Williams. Mae manylion llawn yr holl feirniaid i’w gweld yma: https://t.co/yIPtgaGxXx #LLYF21 pic.twitter.com/jrcApWsyVU
— Llenyddiaeth Cymru (@LlenCymru) March 1, 2021
Cydweithio â BBC Cymru a golwg360 unwaith eto
Bydd yr enillwyr yn cael eu cyhoeddi mewn cyfres o ddarllediadau ar BBC Radio Cymru a BBC Radio Wales yn ystod yr haf a fydd yn cynnwys sgyrsiau â’r beirniaid a’r awduron.
Bydd pleidlais Gwobr Barn y Bobl yn cael ei gynnal ar golwg360 eto eleni.
“Rydym wrth ein boddau fod cyfle wedi codi i gydweithio â BBC Cymru Wales unwaith yn rhagor eleni gan nad oes modd i ni gynnal ein seremoni hwyliog arferol yr haf hwn ychwaith,” meddi Lleucu Siencyn, Prif Weithredwr Llenyddiaeth Cymru.
“Mae’r bartneriaeth ddarlledu hon yn ein galluogi i rannu cyffro a bri Gwobr Llyfr y Flwyddyn gyda chynulleidfaoedd creadigol Cymru a thu hwnt, ble bynnag yn y byd y bônt.”
Cyhoeddir y rhestrau byrion ddiwedd mis Mehefin.
