Cymunedau Cymru’n “talu’r pris am anallu Boris Johnson”

Mae Ed Miliband, llefarydd busnes Llafur yn San Steffan, yn dweud bod cymunedau Cymru’n “talu’r pris am anallu Boris Johnson”.

Daw ei sylwadau yn dilyn y cyhoeddiad mai yn Ffrainc, ac nid ym Mhen-y-bont ar Ogwr, y bydd cerbydau Grenadier y cwmni Ineos yn cael eu cynhyrchu.

Y gobaith oedd y byddai denu’r gwaith i Gymru’n creu hyd at 500 o swyddi, wrth i 25,000 o gerbydau Grenadier gael eu cynhyrchu bob blwyddyn.

Ar ôl penderfynu mynd â’r gwaith i Ffrainc, daeth cadarnhad y byddai’r safle yno yn adeiladu ceir trydan Daimler Smart EQ, ac yn cyflenwi cydrannau Mercedez Benz.

‘Newyddion dinistriol’

“Mae’n newyddion dinistriol y bydd y car Grenadier yn cael ei adeiladu yn Ffrainc yn hytrach nag ym Mhen-y-bont ar Ogwr, yn enwedig yn dilyn cau ffatri Ford gan arwain at ddegau o swyddi sgiliau uchel yn cael eu colli,” meddai Ed Miliband.

“Mae petruso, oedi a methiant Boris Johnson i weithredu’n ymddangos fel pe bai wedi arwain at golli dau o brif gyflogwyr yr ardal – ac mae’n dorcalonnus y bydd cymunedau yng Nghymru’n talu’r pris am ei anallu.

“Mae hefyd yn bradychu sylweddol o ran addewidion a gafodd eu gwneud gan y Ceidwadwyr yn ystod yr etholiad i gyflwyno swyddi a buddsoddiad ym Mhen-y-bont ar Ogwr.”