Mae Prif Weithredwr Cyngor Celfyddydau Cymru, Nick Capaldi, wedi penderfynu rhoi’r gorau i’w swydd.
Ar ôl 13 blynedd yn y swydd bydd yn camu lawr ddiwedd Haf 2021.
Cyn hynny roedd yn Gyfarwyddwr Gweithredol Arts Council England ar gyfer rhanbarth De-orllewin Lloegr.
‘Braint ac yn bleser’
“Mae gweithio i Gyngor Celfyddydau Cymru wedi bod yn fraint ac yn bleser,” meddai Nick Capaldi.
“Rwyf wedi cwrdd â llu o artistiaid ac unigolion creadigol arbennig iawn ac wedi cael fe synnu’n barhaus gan yr ysbrydoliaeth yn y celfyddydau yng Nghymru a’u hansawdd.
“Mae effaith y pandemig Covid-19 wedi mynnu fy holl sylw ac rwyf wedi treulio’r rhan helaethaf o’r flwyddyn ddiwethaf yn gwneud popeth o fewn fy ngallu i ddiogelu’r celfyddydau yng Nghymru.
“Erbyn diwedd yr Haf nesaf rwy’n ffyddiog y bydd gweithgaredd cyhoeddus wedi ailddechrau ac y bydd y celfyddydau’n ffynnu unwaith eto.
“Felly, rwy’n teimlo mai nawr yw’r amser priodol i rywun newydd gymryd yr awenau a chyflwyno syniadau newydd er mwyn mynd i’r afael â’r heriau gwahanol sydd i ddod.”
‘Gwas cyhoeddus rhagorol’
Yn ôl Phil George, Cadeirydd Cyngor Celfyddydau Cymru, mae Nick Capaldi wedi chwarae “rhan allweddol o ran sicrhau eu ffyniant.”
“Mae’n was cyhoeddus rhagorol – o ran ei uniondeb, ei ymrwymiad dwfn a diflino a’i grebwyll cadarn a threiddgar,” meddai.
“Yn anad dim, mae’n gwirioni ar greadigrwydd artistiaid ac mae ganddo angerdd tuag at sicrhau bod profiad trawsnewidiol o’r celfyddydau yn cyrraedd cyfran ehangach o’r cyhoedd.
“Mawr yw ein dyled iddo a byddwn yn ei anrhydeddu yn y ffordd orau, sef drwy barhau’n ddygn â’r gwaith y mae wedi’i wneud mor rhagorol.”
