Gallai brechlyn coronafeirws fod ar gael i bobol fregus yng Nghymru erbyn y Nadolig pe bai’n pasio profion diogelwch mewn da bryd, yn ôl Llywodraeth Cymru.
Dywed llefarydd fod y gwaith o gyflwyno’r brechlyn “yn mynd rhagddo”.
Mae hyn yn cynnwys cludo’r brechlyn, dod o hyd i leoliadau addas i frechu pobol a sicrhau bod y staff priodol ar gael.
Yn ôl y llefarydd, gweithwyr iechyd a gofal cymdeithasol, a staff a phreswyliaid cartrefi gofal fydd yn cael y flaenoriaeth gan fod adnoddau’n brin ar hyn o bryd.
Bydd pobol oedrannus yn cael cynnig y brechlyn yn gynnar y flwyddyn nesaf.
