Mae S4C wedi lansio tair sianel YouTube wedi eu hanelu at blant 11 i 13 oed.
Bydd naw person, sydd wedi cael eu dewis fel ‘Creuwyr Cynnwys’, yn ffilmio a chynhyrchu fideos i’w huwchlwytho ar YouTube, gyda chymorth cynhyrchu gan Boom Cymru.
Dywedodd S4C eu bod yn sefydlu’r tair sianel yma fel ffordd o ymateb i’r newidiadau ym mhatrymau gwylio’r gynulleidfa iau.
“Mae’n hollol glir bod angen i S4C a chynnwys Cymraeg fodoli ar draws llwyfannau gwahanol ac ar gyfer diddordebau gwahanol er mwyn gallu cyrraedd cynulleidfaoedd gwahanol,” meddai Rhodri ap Dyfrig, Comisiynydd Cynnwys Ar-lein S4C.
“Ni all un sianel deledu wneud y gwaith yma i gyd rhagor, felly mae gweld tair sianel newydd o gynnwys Cymraeg ar gyfer pobol ifanc yn ddatblygiad pwysig.”
Y tair sianel yw:
- POPT – cerddoriaeth, y ‘trends’ diweddaraf, a diwylliant poblogaidd
- Gemau Gamma – gemau
- Label Deg – steil, harddwch, lles a meddwlgarwch
“Cyffrous”
“Mae wedi bod mor gyffrous gweld y Crewyr Cynnwys yn mynd ati i ddechrau adeiladu eu sianeli dros yr wythnosau diwethaf, a dwi wir yn edrych ymlaen at weld y creadigrwydd yn ffynnu ar Label Deg, Gemau Gamma a POPT wrth iddyn nhw adeiladu eu dilyniant,” meddai Rhodri ap Dyfrig wedyn.
Mae modd gwylio’r sianeli yma:
POPT: https://www.youtube.com/channel/UClXQRgLoWz2qa4rjpFblo0A?view_as=subscriber
Gemau Gamma: https://www.youtube.com/channel/UCOPuNbOdaAcXMZBRrUKc4HA/videos
Label Deg: https://www.youtube.com/channel/UCh7rT7d-4j9qnEmuvM4UwPQ
