Mae dwy dafarn yn Aberystwyth wedi cael rhybudd i wella eu mesurau er mwyn lleihau’r risg o ledaenu’r coronafeirws.

Cafodd hysbysiad gwella ei gyflwyno i dafarn Yr Hen Lew Du a thafarn The Western yn dilyn ymweliadau gan swyddogion o Dîm Diogelu’r Cyhoedd Cyngor Sir Ceredigion a Heddlu Dyfed-Powys.

Yn ystod ymweliadau â’r Hen Lew Du, dywedodd swyddogion fod angen gwelliannau er mwyn cydymffurfio â’r rheoliadau.

Roedd y gwelliannau hyn yn cynnwys:

  • Sicrhau bod gwybodaeth olrhain cyswllt yn cael ei gasglu gan bob person yn y dafarn a’u cadw’n gywir.
  • Rhoi mesurau ar waith i reoli’r palmant o flaen y dafarn fel bod modd cadw pellter cymdeithasol.
  • Rheoli sut mae cwsmeriaid yn dod i mewn a gadael y dafarn yn ogystal â phan fydd cwsmeriaid yn ciwio.

O ran The Western, mae swyddogion am i’r dafarn:

  • Sicrhau bod staff a chwsmeriaid yn gwisgo masg.
  • Sicrhau nad yw cwsmeriaid yn eistedd/sefyll wrth y bar wrth archebu neu wrth fwyta/yfed.
  • Sicrhau bod gwybodaeth olrhain cyswllt yn cael ei gasglu gan bob person yn y dafarn a’u cadw’n gywir.

Mae gan y ddwy dafarn 48 awr gywiro’r materion neu bydd camau gorfodi pellach yn cael eu hystyried, gan gynnwys yr opsiwn o gyflwyno hysbysiadau cau.