Mae Heddlu’r Gogledd yn dweud iddyn nhw orfod troi oddeutu 60 o gerbydau i ffwrdd o ardal Pen-y-Pas yn Eryri fore heddiw (dydd Sadwrn, Gorffennaf 25).
Dyma’r ail benwythnos yn olynol i bobol heidio i’r ardal yn dilyn llacio cyfyngiadau’r coronafeirws, a hynny er bod y maes parcio ger yr Wyddfa ynghau ar benwythnosau hyd at ddiwedd yr haf.
Y penwythnos diwethaf, rhoddodd yr heddlu gannoedd o ddirwyon yn yr ardal rhwng Pen-y-pas a Phen-y-Gwryd, ond mae’n ymddangos bod pobol yn parhau i anwybyddu’r rhybuddion i gadw draw.
Yn ôl Cyngor Gwynedd, mae conau’n cael eu rhoi ar y ffyrdd mewn rhai ardaloedd er mwyn atal pobol rhag parcio yno, ac mae Gwasanaeth Ambiwlans Cymru’n gofyn i bobol fod yn “gyfrifol” er mwyn lleihau’r pwysau arnyn nhw.
? Mae oddeutu 60 cerbyd wedi cael eu danfon oddi wrth ardal #PenyPas bore ’ma, gyda rhai modurwyr hyd yn oed yn dewis parcio wrth ymyl yr arwyddion.
Meddwl mai ‘bygwth ffug’ oedd o pan ddaru ni ddweud y buasai cerbydau yn cael eu symud…mae cerbyd adfer fyny yno’n barod. pic.twitter.com/CNv4Gda4Dr
— Heddlu Gogledd Cymru #DiogeluCymru (@HeddluGogCymru) July 25, 2020
Os ydych am gerdded i fyny’r Wyddfa, defnyddiwch y meysydd parcio swyddogol – bydd unrhyw un sy’n parcio’n anghyfreithlon yn wynebu dirwyon a chludo’u ceir oddi yno. Mae gwasanaeth bws Sherpa rheolaidd yn cysylltu’r prif feysydd parcio â llwybrau’r copa –https://t.co/XP1XotyKmD pic.twitter.com/JJpSf4xZ51
— CyngorGwyneddCouncil (@CyngorGwynedd) July 25, 2020
“Dylai modurwyr wneud defnydd llawn o’r cyfleusterau parcio sydd ar gael yn Nant Peris, Llanberis a Pen-y-gwryd gerllaw ac i wirio gwefan @croesoeryri i gael y manylion diweddaraf am eu meysydd parcio,” meddai’r heddlu mewn neges ar Twitter.
“Rydym eisiau i bobl allu mwynhau ein mynyddoedd yn ddiogel ond yn gyfrifol.”
