Bydd cerflun o Syr Thomas Picton yn cael ei dynnu o Neuadd y Ddinas yng Nghaerdydd.
Daw yn dilyn pleidlais gan gynghorwyr Caerdydd nos Iau (Gorffennaf 23).
Roedd Picton yn cael ei gofio fel y swyddog mwyaf blaenllaw i farw ym mrwydr Waterloo.
Roedd rheolaeth Thomas Picton o ynys Trinidad yn awdurdodaidd a chiaidd, ac arweiniodd hyn at achos yn ei erbyn yn 1806 yn ei gyhuddo o arteithio Louisa Calderon.
Cyfaddefodd Thomas Picton iddo ei harteithio, a chafwyd e’n euog gan reithgor yn Lloegr.
Pleidleisiodd 57 cynghorydd o blaid cael gwared â’r cerflun, gyda phump yn erbyn a naw yn atal eu pleidlais.
Bydd y cerflun yn cael ei orchuddio tra bod y cyngor yn ceisio cael caniatâd gan Lywodraeth Cymru a Cadw i’w dynnu o’r adeilad.
Fe ddaeth y galwadau i dynnu’r cerflun wedi i brotestwyr Black Lives Matter dynnu cerflun o Edward Colston ym Mryste.
