Emlyn Dole
Mae arweinydd newydd Cyngor Sir Gaerfyrddin wedi cyhoeddi ei fwrdd gweithredol.
Cafodd Emlyn Dole o Blaid Cymru ei ethol a’i gyhoeddi yn swyddogol fel arweinydd newydd y cyngor yn dilyn ffurfio clymblaid rhwng Plaid Cymru a’r Grŵp Annibynnol.
Daw wedi ymddiswyddiad Kevin Madge yr wythnos diwethaf.
Dyma’r tro cyntaf i Blaid Cymru, y blaid fwyaf yn y sir, gael rheolaeth o Gyngor Sir Gaerfyrddin.
Y bwrdd
Mae’r Cynghorydd Pam Palmer yn parhau yn Ddirprwy Arweinydd gyda’r Cynghorydd David Jenkins yn cael ei benodi yn ail Ddirprwy Arweinydd.
Yr aelodau eraill yw:
- Addysg: y Cynghorydd Gareth Jones
- Yr Amgylchedd: y Cynghorydd Hazel Evans
- Tai: i’w gadarnhau
Mae gan Blaid Cymru 29 o gynghorwyr sir ac mae gan y Grŵp Annibynnol 21, sy’n golygu bod ganddynt 50 o aelodau rhyngddynt o blith y 74 sydd ar y Cyngor Llawn.
Tryloyw
“Rydym yn edrych ymlaen at wasanaethu pobl Sir Gaerfyrddin mewn modd agored a thryloyw,” meddai Emlyn Dole.
“Yn ystod yr wythnosau nesaf byddwn yn llunio ein blaen-raglen waith a gaiff ei seilio ar bolisïau cyllidol cyfrifol a fydd yn ceisio sicrhau bod y gwasanaethau cyhoeddus yn Sir Gaerfyrddin yn cael eu diogelu ac yn gwella’n barhaus, ynghyd ag adfywio a chreu swyddi a chyfleoedd cyflogaeth newydd i’r bobl rydym ni i gyd wedi ein hethol i’w cynrychioli.”
Bydd yr aelodau Annibynnol canlynol yn cadw eu portffolios gwreiddiol:
- Y Dirprwy Arweinydd: Y Cynghorydd Pam Palmer
- Adfywio a Hamdden: Y Cynghorydd Meryl Gravell
- Diogelu’r Cyhoedd a’r Amgylchedd: Y Cynghorydd Jim Jones
- Adnoddau Dynol, Effeithlonrwydd a Chydweithio: Y Cynghorydd Mair Stephens
- Gofal Cymdeithasol ac Iechyd: Y Cynghorydd Jane Tremlett
