Gordewdra ymysg plant: Ynys Môn gyda’r gyfran uchaf

Mae angen hybu byw bywyd iach meddai Iechyd Cyhoeddus Cymru
Mae bron i draean o blant ysgol gynradd Ynys Môn yn ordew, yn ôl arolwg newydd a gyhoeddwyd heddiw.

Mae’n golygu mai Ynys Môn sydd a’r gyfran uchaf o blant gordew. Cyn hyn, Merthyr Tudful oedd y sir gyda’r ganran fwyaf o blant dros eu pwysau neu’n ordew yng Nghymru.

Yn ôl y ffigyrau gan Iechyd Cyhoeddus Cymru mae 32.3% o blant oedran cynradd ar yr ynys dros eu pwysau neu yn ordew, o’i gymharu â’r cyfartaledd cenedlaethol yng Nghymru o 26.5%.

Roedd 32% o blant Merthyr Tudful dros eu pwysau neu’n ordew.

Roedd y cyfartaledd isaf dros Gymru ym Mro Morgannwg, ble roedd 21% o blant pedwar neu pum mlwydd oed dros eu pwysau neu yn ordew.

‘Hybu byw bywyd iach’

Dywedodd Dr Julie Bishop o Iechyd Cyhoeddus Cymru y dylai byw bywyd iach gael ei hybu ymysg plant meithrin ar hyd a lled Cymru.

Ychwanegodd y dylai blant “chwarae tu allan yn fwy aml” a bod prosiectau fel Cymunedau’n Gyntaf a grwpiau mam a’i phlentyn yn gallu helpu rhieni.

Dyma’r ffigyrau cyfartalog dros Gymru:

Ynys Môn – 32.4%

Merthyr Tudful- 32.0%

Sir Benfro – 31.0%

Gwynedd- 30.1%

Wrecsam- 29.4%

Ceredigion- 28.7%